Majan 6 ning masat lamang woi ningbaw 3 hpe tara jawat

June 13, tara jawat hkrum ai ningbaw masum Myitkyina tara rung de sa wa yang

June praw 9, bat Manga Ya shani Myitkyina, Shatapru Manau e galaw ai Jinghpaw Ginra Majan 6 ning hpring masat lamang woi galaw ai ningbaw masum hpe Myen asuya tara masa hku ahkyak la ai lam galaw ai re.


Myitkyina Wunpawng Amyusha Mungbawng Rapdaw, WMR, ningbaw Slg. Hkun Seng yan Amu Madu Slg. Labang Gam Awng, hte Mungshawa Zinlum Hpung-Myitkyina ningbaw Slg. Zau Jat ni hpe ‘lam hkawm n-gun madun ai’ hte seng ai tara upadi daw kaba 19 hte Myitkyina Masat (1) Pyada Dap kaw nna tara jawat tawn ai re.

Ndai manghkang hte seng nna, June 13, danai Myitkyina Tara Rung kaw tara dara ai shaloi, tara hkam Slg. Zau Jat ndai zawn tsun mat ai re.

“Anhte lam hkawm n'gun madun ai n re. Akyu hpyi hpawng galaw ai she re. IDP ni hpe htaw wa htaw sa na jarik n jin ai majaw, IDP ni lam hkawm sa wa ai she re.”

Tara agyi hku nna tara hkam masum hpe marai langai gumhpraw dam Myen kyat 30,000 gayet nna manghkang hpe shangut ai re.

Manau Wang, Majan 6 ning hpring akyu hpyi hpawng galaw ai shaloi, IDP hpyen yen ni gaw shanhte hkam sha ai, “Myen hpyendap hpe n ra ai, htim gasat majan n ra ai, mungdan kata mung maden majan n ra ai” ngu ai laika poster ni hpe mung hpai sa ai re lam hpe Slg. Zau Jat tara rung e sanglang mat ai lam tsun ai.

Akyu hpyi lamang hte Myitkyina, Waimaw mare lahkawng na buga masha ni hte hpyen yen ni yawng shawa masha 8,000 jan shanglawm sai re.