Daini Lido lam shara 2 hte Nambyu maga gap hkat

June 6 Nambyu, Namhkam hte pat maw, ja maw hkan na masha ni Pauk Wah hka daru hku Danai de pru wa ai ni hpe Myen hpyen ni hkap jep nga yang

Daini Hugawng Pa, Lido lam shara lahkawng hte Nambyu N’Ga Ga kahtawng makau hta Myen hpyendap hte KIA Dung 14 lapran gasat gala majan ni byin ai re.


N’Ga Ga de Myen ni n-gun bai jat ai majaw ya shiga ka nga ai Myen mung aten hkying 6pm jan du hkra, wuhpung lahkawng dap lapran laja lana gap hkat nga ai lam, ginra masha ni hku nna chye lu ai.

Bai nna, Namti hte Dumbung lapran Loili Yang hte Nawnglung Kawng Ra hte Namhpyet lapran hta mung aten kadun gasat gala byin ai lam sagawn chye lu ai.

June praw 3, lai wa sai bat kaw nna Wunpawng Mungdan Shanglawt Hpyendap KIA Dapba 2 npu Dung 14 ginra, pat maw, ja maw nga ai de Myen hpyen ni kalang bai majan baw gasat wa ai majaw shani shagu gasat gala majan ni byin nga ai re.

Myen hpyen nbungli ni gaw June praw 5 ya shani pat maw, ja maw ni hta nga ai masha yawng June 15 ya shani hpang jahtum pru na matu laika agat shabra dat sai re.

Dai re majaw, KIA Dapba 2 kata Dung 6, 11 hte 14 hku nna mung Myitkyina-Danai Lam, Mugawng-Hpakan lam ntsa June 10, hpawt na kaw nna ‘shana kadai n mai lai na’ lam pat ai sadi jaw laika ni hpe ndau shabra dat ai re.

Bat mi jan majan a majaw majan ginra hte pat maw, ja maw na masha ni nkau Danai de hprawng yen nga sai raitim nkau Myen ni ahkang n jaw ai majaw chyat rawng ai mung nga nga ai lam hpyen yen lakawn lanawn hpung ni tsun ai.

Daini, June praw 9, Myen asuya hte Wunpawng Mungdan Shanglawt Hpung KIO lapran majan kalang bai byin wa ai 6 ning hpring ai nhtoi hta ya na zawn Hugawng Pa de wuhpung lahkawng dap lapran majan bai laja wa ai re.