Majan hta chyat rawng ai hpyen yen 400 jan hpe nawku hpung woi shale

June 6, 2017 ya shani Nambyu, Nam Hkam hte Pat Maw na hpyen yen ni Danai de hprawng yen du wa

Hugawng Pa pat maw, ja maw ni hta byin ai majan a majaw chyat rawng ai hpyen yen mungshawa 400 jan hpe mani, June 6, hta nawku hpung ni Danai de woi shale la lu sai re.


Shanhte gaw Nambyu, Namhkam hte Pat Maw hkan na rai nna seng ang ai Myen asuya ahkaw ahkang lu ni hpe jahkrup nna ya na zawn shale la lu ai re lam, nawku hpung shiga lawk tsun ai re.

Ya na zawn hpyen yen ni hpe Danai de woi shapraw ai hta, Myen hpyen ni gaw “Hkingmang daju a matsun hte maren” nga nna lam shara mali kaw mungchying masat hte arai sawk jep ai lam ni galaw nga ai hpe chye lu ai.

Ndai lam hte seng nna Jinghpaw mungdaw hkringmang daju Dr. Hkyet Awng hpe san yu ai shaloi, ‘dai shiga na nna shi mau ai lam, dai zawn hpyen yen ni hpe sawk jep na matu shi matsun ai lam n nga ai’ nga nna nawku hpung shiga lawk hku matut chye lu ai
June-6,-2017-Danai-de-shapaw-la-ai-hpyen-yen-nihpe-Myen-ni-hkap-jep-nga-yang.jpg
Ya na zawn, jam jau let hpyen hprawng wa ai mung shawa ni hpe hkrup mara hkap jep ai lam gaw n galaw ging ai amu re nga nna mungdaw asuya salang ni lapran tsun garu nga ai hpe matut chye lu ai.

Ledo lam ntsa majan ginra hte deng 3 daram sha gang ai, Danai hte deng 10 tsan ai Kawng Ra (Nawng Lung) mare masha ma hkra gaw mani Danai de hprawng yen nga sai re.

June praw 3 ya shani kaw nna KIA Dung 14 ginra kata Myen hpyen ni htu wa ai majaw laja lana majan ni shani shagu ngu na byin nga ai re. Lisu pyitusit hte Sam Hkyeng pyitusit ni mung Myen asuya dap maga shanglawm ai lam chye lu ai.

Ndai ten Myen hpyen nbungli ni gaw ja maw, pat maw ni hta laika jahkrat nna June 15 ya shani hpang jahtum maw ginra na masha ma hkra pru na matu matsun sai. N pru jang KIA ngu masat na re lam sadi jaw tawn ai re.

Ya zawn Danai de kalang bai majan kaba wa nga ten, Myen hpyendap gaw matut mahkai phone line yawng ngu na pat da ai lam, MPT sha loi kaja ai lam, ginra masha ni tsun ai re.