Dinglun hkrum ten, KIO mungmasa sanglang hpawng galaw

Dukaba Nban La, KIO Tingyang-up Malai, Laiza mungmasa sanglang hpawng. Sumla: Nlam Hkun Awng

Wunpawng Mungdan Shanglawt Hpung, KIO tingnyang-up malai, Dukaba Nban La gaw, shi a Naypyidaw Myen asuya a Tsaban 21 Panglong Zuphpawng de akajawng sa lung ai lam hta dinglun hkrum nga ten, Laiza dapshawa mungshawa sanglang hpawng shaga galaw sai.


Bat kru ya, June 3, Padang Rung e galaw ai lamang hta, KIO hpa majaw UNFC na pru ai lam, UWSA Wa ni woi ai mungmasa npu hpa majaw shanglawm ra ai lam, hte hpa majaw Tsaban 21 Panglong Zuphpawng shanglawm ra ai lam, ni sanglang mat ai re.

Tingyang-up malai sanglang ai hta, "Panglong nyi-la-hkan sa ai gaw mala la sum machyi ai lam gaw n re. Maga mi awngdang ai mahkrun mung lu la ai ngu ai hpe mung sanglang dan mayu ai re. Ya gaw ginjaw woi galaw ai hpe n kam ai zawn zawn, n kaw ai zawn amyu myu tsun shaga ai hpe facebook kaw hti yang gaw mala la nga ai ni mung grai lawm ai le."

Raitimung UNFC a CEC komiti malawm hte maigan daju Jinghpaw Wunpawng Amyusha Hpung, KNO Ningbaw Duwa Bawmwang Laraw gaw ndai zawn shi a ningmu tsun shapraw ai re.

"Jinghpaw Wunpawng amyusha ni a ningbaw langai hku nna sa gaw sa ai.. E rai nna dai zuphpawng hta mung amyusha lam mung, wuhpung wuhpawng lam hta mung hpa baw mung tsun n lu, n shaga lu, n hparan lu rai nna majoi sa ai ngu jang gaw... E dai gaw lamang n jaw ai step (ninggam) re ngu hku dai hku mu ai."

KIO ginjaw mungmasa hte seng nna mung, "N re ai bungli gaw n galaw woi nga ma ai ginjaw ni. Re majaw gaw yawng gaw hkam sharang nna myit n hkawn ai rai jang mung loi mi naw la yu rai nna ginjaw a woi awn ai mungmasa shawnglam bungli kaw yawng lahkrip ra ra rai na naw hkan madi shadaw hkan nang hkan sa rai ga..." nga nna Dukaba Nban La lajin ai re.

Raitim lai wa sai ten KIO ginjaw gaw shut ai mungmasa hta lang hte lang tsap lai wa sai re.

17-ning simsa lam ladaw, tinang mungmasha ni ja ja ninghkap ai lapran Myen hpyendap a 2008 gawda ai tara hpe madi shadaw ya ai. Raitim Myen hte 1994 simsa lam gaw 2011 June praw 9 majan hte ginchyum dat ai kaw du ai re.

Dai hpang 2013 hta Miwa garum ai majaw Myen hte gap hkat jahkring sen n htu tim, majan shayawm na myit hkrum ai majaw KIO kithkai rung ni hpe Myitkyina, Mandalay, Yangon ni hta hpaw lu ai. Raitim Myen hpyendap gaw majan grau she gasat wa ai majaw ya hpang jahtum Gidon post hpe zing la ai kaw du hkra re.

Bai nna lai wa sai 1976 ning hta, Karen KNU hte KIO woi nna NDF, National Democratic Front, amyusha rawt malan hpung daphpawm hpe hpaw wa sai re. NDF a yaw shada lam gaw hpyen masa mungmasa majan lahkawng hte jet ai federal munghpawm gaw de na bandung re.

Raitim, KIO shawng dai daphpawm NDF na ga garan pru nhtawm 1994 ning hta Myen hte simsa lam la ai re. Dai simsa lam gaw Myen hpyendap ka ai 2008 gawda ai tara hpe madi shadaw ya ai hta lai hpa n lu galaw ai re.

Ya kalang bai KIO ginjaw hkawm ai mungmasa kahtap shut na kun? Tinang n-gun dat woi hpaw ai UNFC daphpawm kaw na pru nhtawm, United Wa State Army, Wa ni woi ai mungmasa npu KIO shanglawm nga sai re.

Bat kru ya shani mungmasa sanglang hpawng hta, KIO woi ningshawng ai SMJH, shawnglam mungmasa jasat hpung malawm ni, Myitkyina de na saw shaga ai WMR, Wunpawng Amyusha Mungbawng Rapdaw, hte nawku hpung ningbaw ningla ni shanglawm ai re. Raitim, Jinghpaw mungmasa pati ni hpe saw shaga ai lam n nga ai.

Hkying hkum lahkawng galaw ai KIO tingnyang-up malai Dukaba Nban La a mungmasa sanglang hpawng hta du sa ai shawa masha maga na ga san san na ahkang n jaw ai re.