Myen dap ni Kawng Ra mare de laknak kaba gap, gaida hkan nu 3 hkala

Myen asuya dap ni mare de laknak kaba ai majaw, Kawng Ra mare masha 3 hkala hkrum, June 5, 2017

Mana yuptung hpawa 12:30am daram hta Ledo lam Kawng Ra mare de Myen asuya dap ni laknak kaba mali lang matut manoi gap bang ai majaw, Nbwi jan gaida hkan nu nta masha 3 hkala hkrum sai re.

Hkala hkrum ai hta, kanu ngu na ladi kaw hkra nna ma yan gaw lagaw lata hte du hta ningma kap ai re. Raitim grai sawng madang n re. Ya ten shanhte hpe ni nawn ai Danai asuya tsirung hta tsi lajang nga sai re.

Bai sinat kaba pala ni gaw mare madaw lam ntsa mung wa hkrat kapaw ai kaw dumsu 1 si nna 3 hkala hkrum ai lam, mare masha ni Jinghpaw Shiga Dap, KNG de daihpawt tsun ai.

Mare masha ni tsun ai hku rai yang, laknak kaba si gaw 60mm rai nna dai hpe Ledo lam Awnglawt Mare lambraw Nga Mai Kung na Myen dap gap ai re, nga ai.

Ledo lam ntsa Kawng Ra shing n rai Nawnglung mare gaw Daina hte deng shi gang ai rai nna, Wunpawng Mungdan Shanglawt Hpyendap KIA Dung 14 hte Myen dap, hpyen lahkawng lapran nga ai mare mung rai nga ai.

Ndai laman pat maw nga ai KIA Dung 14 Nambyu maga de Myen hpyen ni htu wa ai majaw gasat gala majan ni byin nga ai re.

Dai hta June praw 3 Bat Kru Ya shani KIA Dung 14 a Maisa post hpe Myen ni gasat zing la sai re.

Dai hpang ya na zawn mare de 60mm sinat kaba gap bang wa ai majaw, dai hpawt kaw nna Kawng Ra mare masha nkau Danai, Myitkyina ni de hprawng yen ai lam ni mung nga ai lam, mare kanu kawa ni Jinghpaw Shiga Dap KNG de tsun wa ai re.