Myen sau Miwa de no.1 lang ginlen du

Myen sau no.1 lang Miwa mung de ginlen du

Myen mung Rahkai mungdaw na sau hpe pipe dumdawng hte ginlen shalai ai Miwa mung Yunnan mungdaw de no.1 lang du wa sai re.


Rahkai panglai kaw nna, Myen mung sinna Miwa jarit du hkra deng 882 jan (1,420 km) gang ai re. Ndai gaw Myen-Miwa yan a dat nsa (gas) hte sau (oil) ginlen masing a daw chyen rai nga ai.

Ndai sau katsing (crude oil) gaw May 19 ya shani Miwa ga jarit de du ai re lam, Miwa asuya shiga ni hta tang madun ai re.

Sau pipe lam daw chyen gaw Lahta Sam mung (Kachin Sub-state) kata, Wunpawng Mungdan Shanglawt Hpyendap, KIA, Dapba 4 ginra hpe lai dit nna Miwa ga jairt Shweli de lai shang ai re.

Shweli kaw nna sau shadu jak nga shara Anning mare de du hkra deng 403 jan (650 km) naw ginlen la ra ai lam chye lu ai.

Ya ginlen la ai Myen sau hpe Miwa mung Sinna Dindung Daw ginra ni hta madung dut shabra jaw na rai nga ai re.

Myen mung na sau no.1 lang ginlen du wa ai video sumla hkrung hpe May 22, daini na Miwa asuya Xinhua shiga hta mung tang madun ai hpe mu lu ai.