Gumgrawng Awng Hkam, KDP ningbaw

Amyusha madang mungmasa bawngban hpawng rai n lu galaw shi ai amyu baw ni a ra sharawng ai myit masin ni hpe asuya hku nna shingdu n tawn na matu hpunau amyu baw pati daphpawm NBF, dai ni May 17 ya hta hpyi lajin dat sai re.


Mungdaw 7 na amyusha pati 24 hte hpaw da ai Nationalities Brotherhood Federation, NBF a Yangon mare e 2-ya hpawng ai kaw ndai zawn hpyi shawn ai lam ndau dat ai re.

‘Amyusha madang mungmasa bawngban zuphpawng n lu galaw shi ai amyu baw ni hpe shanhte a ra sharawng ai htap htuk ai ginra ni hta amyusha zuphpawng galaw na ahkang jaw na matu hpyi shawn ai. Zuphpawng n lu galaw shi ai amyu baw ni a myit masin hpe mung shingdu tawn ai lam n galaw na hpyi shawn ga ai.’

Jinghpaw Mungdaw e Wunpawng Mungdan Shanglawt Hpung, KIO hku nna Myen asuya hte NCA mungdan ting gap hkat jahkring ga sadi lakmat n htu shi ai majaw amyusha madang mungmasa bawngban hpawng hpe tara shang galaw na ahkang n lu shi ai re.

Ya lahkawng ya galaw ai ndai NBF zuphpawng e malawm pati 22 na ningbaw ningla ni sha n ga, amyu baw mungmasa pati ni hte gumhpawn da ai ‘munghpawm simsa lam jahkrup jahkrum ginrun komiti’ UPDJC salang ni mung, dai zuphpawng de sa du shang lawm ai re nga Kachin Democratic Party, KDP ningbaw Duwa Gumgrawng Awng Hkam tsun ai re.

NBF a federal masa hte rudi amyusha ni a mungmasa ahkaw ahkang lam hte seng nna mung May 24, du na bat masum ya shani galaw hpang na, asuya Tsaban 21 Panglong Zuphpawng de tang madun mat wa na re nga, Slg. Awng Hkam tsun ai re.