Uma Ga de hku hku, nai htu sha ra

Uma Ga de hku hku, nai htu sha ra

Uma Ga ngu ai Mali-N’mai Walawng hte Mali-Hkrang Walawng e hku hku ai majaw ginra masha ni lai wa sai April shata kaw nna nam de nai tam htu sha nga ai chye lu ai.


Ndai ginra lahkawng e hkarang yi hpe madung galaw sha ai re. Raitim maning yi nat ten, jan n pru ai daram shani shana lamu marang hkrai htu ai majaw yi atsawm n lu galaw ai majaw dai ning hku hku ai re lam ginra masha ni Jinghpaw Shiga Dap KNG de tsun ai re.

Ya ya hkuwa hkrum nga ai Mali-N’Mai Walawng mare kahtawng (8) nga ai re. Dai ni gaw--- htinggaw 40 jan nga ai Nbang Bum hte Share Uma; htinggaw 20 jan nga ai Htoi Ra Yang hte Machyang rai nna htinggaw 10 jan nga ai Shadan, Lana, Naw Lang hte Lahkum ni rai nga ai.

Dai hte maren, Mali-Hkrang Walawng de na mare kahtawng masha ni mung lusha taw nna nai htu sha nga ai lam sagawn chye lu ai.

Hkarang yi hte kanbau ai ndai Uma Ga ginra gaw Wunpawng Mungdan Shanglawt Hpung, KIO Dingdung Ginwang Ginjaw a uphkang ginra rai nna, shawng de mung dai zawn hku hku ai lam ni hkrum sha lai wa sai rai nga ai .

Lusha yak ai hpe garum la na matu, N’gumla Dingdung Ginwang Ginjaw komiti de ginra masha ni garum hpyi da ai hpe DGG hku na lu garum na shakut nga ai zawn, Laiza ginjaw de mung dai lam shiga tang madun tawn ai lam DGG shiga lawk tsun ai re.

DGG shiga lawk tsun ai hta, hku hku ai mare kahtawng ni de shinggan garum ntum jaw ai lam ya ten du hkra hpa mung n nga shi ai re nga ai.

Ya Myitkyina e n-gu buri mi Myen kyat 30,000 grupyin rai nga ten, DGG ginjaw N’gumla kaw n gu buri mi kyat 45,000 hte 55,000 lapran rai nna, Mali-Hkrang Walawng de gaw kyat 60,000 re lam chye lu ai.

Jinghpaw mungdaw mare daju Myitkyina kaw na Mali Hka hku ja maw ni de jakli hte shalun ai n-gu ni hpe mari sha mai ai raitim, gumhpraw n lu ai hte matut mahkai lam n kaja ai lam a majaw mung n gu mari sha lu na yak lam chye lu ai.

Dai ning du hkra ladaw kaja ai majaw, ya ten, yi nat mam ting atsawm galaw lu sai raitim du na November Mangai Ta n du shi yang, Uma Ga e hku hku ai lam matut byin nga na rai nga ai re.