Manje hpyendap makau bawm kapaw ai kaw ma 1 si, 2 hkala

Manje mare, Manmaw Ginwang

Jinghpaw mungdaw Manje mare Pyi Oo Lwin lawk Myen hpyendap makau bum yi e April 19 ya shana de bawm kapaw wa ai majaw, yi hkran sawm nga ai dinghku langai na nta masha 1 si, 2 hkala hkrum sai re.

Bawm hkra ai gaw Slg. Wahpai Brang Nan a madu jan Ahle Mee hte num kasha marai 3 re. Asak kaji htum Shy. Htu Tawng 9 ning bawm kapaw ai shara kaw nan n nga mat nna, Shy. Ji Pan 16 ning hte Shy. Seng Pan 22 ning yan hkala hkrum ai re.

Dai mabyin hte seng nna hkala hkrum ai ma ni a kawa doi Slg. La Doi hku nna Jinghpaw Shiga Dap KNG de ndai zawn tsun ai.

“Ya byin ai shara gaw anhte Manje mare hte htep sha rai nga ai. shana de hkying 4 chyen daram yi sa ai kaw she hpyen dap hte yi gaw htep sha rai nga ai. Ma ni hkran sawm ai kaw she bawm kapaw wa ai. Kanu gaw loi mi lahta kaw, ya byin ai ma 4 gaw loi mi nhkrem kaw dai hku galaw nga ai kaw kapaw wa ai.”

Yi hkyen, yi nat ngut nna hkran sawm ai mali ya ngu na nhtoi e ya na zawn bungli galaw ai yi yang kaw bawm kapaw la ai rai nga ai.

N nga mat sai Shy. Htu Tawng gaw tsang 3 htai da ai rai nna, Shy. Ji Pan gaw tsang 10 htai da sai re lam chye lu ai. Shy. Seng Pan gaw Sagaing Hpaji Jawng Kawlik hpang jahtum shaning re lam chye lu ai.

Hkala hkrum ai shayi sha 2 hta marai 1 mi ningma sawng ai nga nna kawa doi matut tsun ai.

“Machyi hkrum ai kana kaba wa gaw loi mi hkyam sa wa sai. Ma roi ngu na wa gaw loi naw sawng nga ai. Shi gaw lahta, magri hte nshang shara masum kaw hkra mat ai. Nshang kaw hkra ai gaw sinde hte sin kaw hkra ai nga nna n ga ya shi ai. Dai wa gaw loi mi naw sawng ai re.”

Shy. Htu Tawng hpe April 20 ya shani makoi mayang sai lam chye lu ai.

Bawm kapaw ai shara hte Myen hpyendap Hk.M.Y 319 hpyendap gaw meter 100 dang sha gang ai lam chye lu ai.

Mabyin hpang shani, April 20 ya hta Manje pyada dap du salang ni ndai manghkang shawk shawn ai lam n galaw na matu sa tsun ai ten, yawn hkyen hkrum ai dum nta masha ni maga hkrit ai majaw myit hkrum sen htu kau ya ai lam chye lu ai.