Kokang de majan laja ten, KIA Dapba 6 ni Myen hpe gap hpang

Munggu ginra shawnglawm hta mu lu ai KIA Dapba 6 hpyenla ni

Shani shagu majan laja lana byin nga ai Kokang ginra hte Sak Hkung Hka sha din ai Wunpawng Mungdan Shanglawt Hpyendap KIA Dapba 6 ginra kata dai hpawt kaw nna Myen hpyen hpung hpe hkap gasat hpang dat sai re.


Manping lam hku nna Howa Bum mare dingsa de lung wa ai Myen hpyendap dapnu (tat-ma) 11 kata hpyen hpung hpe KIA Dapdung 36 hte MHH (Mungshawa Hpyen Hpung) ni jawm hkap gasat ai re lam, Dapba 6 salang ni Jinghpaw Shiga Dap de tsun ai.

Mungbaw, Mai Hpang Myen dap kaw nna mung 120mm 7 lang gap garum wa ai hpe sagawn chye lu ai.

Jahpawt hkying 8 kaw nna 12 daram du hkra byin ai kaw Myen maga si hka law nna bai htingnut mat ai lam Dapba 6 salang ni tsun ai re.

Tinang KIA maga hkala nba n nga ai lam tsun ai re.

Lai wa sai December kaw nna Lahta Sam mung KIA Dapba 6 Munggu ginra e gasat gala lam ni n nga mat ai daram byin mat ai re.

KIA gaw kaga hpunau rawt malan hpung kru--- Wa (UWSA), Kokang (MNDAA), Rahkai (AA), Sam (SSPP/SSA), Sam (NDAA) hte Balawng (TNLA) ni hte rau, February 24 Wa mung Panghkam ndau hte maren, Myen hpyendap hte asuya dip n-gun jaw nga ai NCA mungdan ting gap hkat jahkring ga sadi hpe, n hkap la sen n htu sai lam, asan sha nyet kau sai re.

Ndai zawn ndau dat ai hte, Myen asuya dap hte daphpawm lapran Kokang ginra e laja lana gasat poi ni byin nga ai re. Raitim Jinghpaw mungdaw hte Lahta Sam mung (snr Kachin Sub-state) KIA ginra ni hta gaw gasat gala majan kaba n nga ai re.

Dai hpawt majan n byin shi ai shawng e gaw, Munggu ginra kata Myen hpe n gap gasat na matu KIA ginjaw kawn pat hkum tawn ai lam hpe KIA Dapba 6 shiga lawk hku chye lu ai re.