Lahta Sam mung majan e KIA Zai Ladat Up hkrat sum, hpyenma 4 hkala

KIA Dapba 6 hpaw poi, Mai Ja Yang, Feb, 2016.

Dai ni shani ga-ang daw, Lahta Sam mung Wunpawng Mungdan Shanglawt Hpung KIA Dapba 6 ginra kata Myen asuya dap hte byin ai majan hta KIA Zai Ladat Hpyen Hpung Up hkrat sum nna hpyenma 4 hkala hkrum ai re.


Kutkai a sinpraw-dingdung maga, KIA Dung 2 ginra Nam Kang Lung kahtawng hkyet kaw aten 12am hte 1:30pm lapran byin ai majan hta KIA Dapba 6 kata Zai Ladat Hpyen Hpung Up, Dkb. Nhku La Ring hkrat sum nna shi hpyenma 4 mung hkala hkrum ai lam, Dapba 6 shiga lawk tsun shateng ai.

Myen hpyen ni hkap nga ai kaw ambush hkrum ai re lam, Dapba 6 hpyendu langai Jinghpaw Shiga Dap KNG de tsun ai.

KIA shanglawm ai Lahta Sam mung amyusha rawt malan hpung daphpawm, Northern Alliance-Burma hte Myen hpyendap lapran maning November shata kaw nna gasat gala majan ni shani shagu ngu na byin nga ai re.