Gidon Post kaw majan bai laja, Myen 70 jan bai si sum

Shawnglam ginra kaw du nga ai KIA hpyenla lahkawng

Daina maga hkying 5pm jan kaw nna KIA DND 252 Gindon Post de hpyen n-gun kaba hte lung wa ai Myen hpyen ni hte hkying hkum mi daram, laja lana majan bai byin ai kaw Myen 70 jan si sum nna 40 jan hkala hkrum wa sai lam, KIA shawnglam shiga lawk tsun ai.


KIA maga si hkala n nga ai lam hpe shawnglam KIA shiga lawk kawn Jinghpaw Shiga Dap KNG de tsun ai re.

Shawng e Sept. 16-17, lahkawng ya KIA Gindon Post kaw laja lana byin ai majan kaw Myen maga 30 jan si nna 40 jan hkala ai hte bai htingnut mat ai re.

Ya daina maga de gaw, Myen dap ni hpyen man lahkawng, n-gun kaba hte bai htu gasat lung wa ai kaw KIA dapnawng hpyen hpung ni hte laja lana gasat gala majan byin wa ai lam re.

Ndai ten Wunpawng Mungdan Shanglawt Hpung, KIO Ginjaw Komiti kaw nna, “Jinghpaw mungdaw kata majan kaba byin wa na masa hta akyu ja ja hpyi nga na matu” tinang mungchying mungshawa ni de mani, September 19 ya nhtoi hte ndau shabra dat sai re.

Ndau hte seng nna seng ang ai KIO hte nawku hpung woi nkau hpe san yu ai shaloi, dai KIO Ginjaw Komiti a ndau tengman ai lam Jinghpaw Shiga Dap KNG de tsun ai re.