Myen hte KIA majan Jinghpaw, Sam mungdaw lahkawng e byin

Shawnglam n rawt shi yang akyu hpyi nga ai, KIA Dung 3 hpyen hpung

Daini September 20 lani mi kaw Myen asuya dap hte Wunpawng Mungdan Shanglawt Hpung KIA lapran, Jinghpaw hte Sam mungdaw lahkawng kaw gasat gala majan ni byin wa sai re.


Dai hpawt daw, Myitkyina-Manmaw lam Ga Ra Yang mare kaw lagaw lam yan lung ai asuya hpyen hpung hpe KIA Dung 3 ni bawm hte hkap gasat ai kaw si hkala law na re lam, KIA shanglawm shiga lawk tsun ai.

Lwidoi si pru ai Ga Ya Yang mare kaba gaw, 2011 ning Jinghpaw majan bai byin wa ai hpang mare masha yawng hpyen yen mat nna ya dai mare kaw Myen hpyen ni dap jahkrat nga ai re.

Maga mi de Lahta Sam mung hta, Lashu a sinpraw KIA Dapba 4, Dung 17 ginra Shan Htung Bum makau kaw aten pyen 2pm jan e Myen Dapnu (tat-ma) 99 hpyen hpung hte hkying hkum 2 jan gasat gala majan byin wa ai re.

Ndai majan e lahkawng maga dap na si hka lam n chye lu ai.

Myen asuya woi galaw ai, August 31-September 4, Tsaban 21 Panglong Zuphpawng hpaw poi ngut ai hte, tatmadaw hpyendap gaw Jinghpaw mungdaw de lawu mung na hpyen n-gun kaba, laknak n-gun kaba hpe wanleng lam, hka sanghpaw hku nna ginleng bang nga ai re.

Ndai sat lawat yu yang, Myen hpyendap gaw Jinghpaw ni hpe majan kaba bai baw na maw mawn ai re lam yu maram nga ai re.