Miwa pyada, KIA hte PJS ni kani nanghpam jawm rim

Miwa pyada, KIA hte PJS ni kani nanghpam jawm rim
Miwa pyada ni garum hpyi ai majaw kani nanghpam dut shabra ai Miwa mung masha 3 hpe Wunpawng Mungdang Shanglawt Hpyendap Ba 6 hte ginra Pat Jasan Hpung PJS ni pawng nna September 10, bat Kru Ya shana rim kau sai re.
Lahta Sam mung Pang Sai (Kyukoke), Nam Ba Tep kahtawng de du wa ai kani dut hpaga galaw ai Miwa hpawmi 2 hte la 1 hpe ya-ma (gumra tsi) kani tsi hkyep sen 2 hte kani hpraw kilo 1 hte hpawn lu rim ai hpe PJS ni Jinghpaw Shiga Dap KNG de tsun wa ai.

Dai ya-ma tsi hkyep 1 gaw, ya ten Miwa gumhpraw Yuan 25 (kyat 4,600) manu nga nna, kani hpraw kilo 1 a manu rai yang Miwa Yuan 43,000 daram (kyat sen 80) re nga rim ai ni tsun ai.
Rim la lu ai kani nanghpam hte masha 3 hpe September 11 Laban Ya shani hta Miwa pyada ni hpe ap ya sai lam KIA Dapba 6 salang ni tsun ai.
Ya na zawn Miwa gumsan mungdan pyada ni hte Lahta Sam mung KIA hpyendap ni, Pat Jasan Hpung ni pawng nna ya na zawn kani dut hpaga galaw ai ni hpe rim ai gaw ndai lang shawng n’nan re lam ginra masha ni tsun ai.