Laiza lam maga shamu ai Myen dap hpe KIA gap shingla

Laiza lam maga shamu ai Myen dap hpe KIA gap shingla
Dai hpawt daw Laiza ginjaw hte deng 10 kata, Myen asuya hpyen hpung ni shang shamu shamawt wa ai majaw KIA maga bawm hte gap shingla ai lam galaw sai re.
Dai Myen dap hpe Nam San Yang lupba e KIA bawm hte hkap kapaw ai re lam Laiza shawnglam ginra na KIA hpyendu langai Jinghpaw Shiga Dap KNG de tsun wa ai.

Ndai bawm hte hkap gasat ai hta asuya dap maga si hkala ai nga tim, jahpan hku nna n chye lu shi ai lam shi matut tsun ai.

Nam San Yang mare gaw Jinghpaw mungdaw sinpraw Myitkyina-Manmaw lam ntsa, KIA ginjaw Laiza a sinna dingdung maga deng 10 daram hta nga ai re.

Dai mare hte ni ai, Seng Mai kahtawng de mung Gangdau Yang e daju ai asuya hpyen hpung hte KIA dap lapran, mani shani kaang hpang aten gadun gasat gala majan byin wa sai.

Dai majan hta Myen dap maga marai 4 si nna kaga 10 jan hkala ai lam KIA shawnglam shiga ni hta tang madun ai.

Lai wa sai masum ya kaw nna Myen hpyendap ni gaw shawoi na hta grau KIA ginjaw ginra Laiza maga de lak lak lai lai ‘hpyen masa shamu shamawt ai lam ni, dap galai gachyai hkrang hte hpyen n-gun jat ai lam ni’ galaw wa ai lam KIA shawnglam shiga lawk tsun ai re.

Asuya hku nna ‘Munghpawm Simsa Lam Zuphpawng- Tsaban 21 Panglong’ galaw hpang ai hpang, tatmadaw hpyendap maga amyusha rawt malan hpung ni ntsa majan baw gasat ai lam ni ninggam jat galaw wa ai majaw, ya ten Jinghpaw, Sam hte Kayin mungdaw ni hta majan grau laja wa nga sai re.