Ma 6 dinghku la, Myen hpyen ni a porter lahkawn hkrum
Waimaw ginwang ma 6 a kawa langai hpe ‘rai gun porter hte ginra lam madun’ hku nna Myen hpyen hpung ni rim woi mat ai gaw, daini hte rai yang lahkawng ya hpa shiga n na mat taw ai lam, shi hte ni nawn ai ni tsun ai.
Washawng makau, Garut Yang kahtawng na Slg. Kawn La, asak 31 hpe Myen hpyen hpung ni July 17 aten hkying 11 daram e rim woi mat ai rai nna, ya ten du hkra shi nta n du wa ai hte matut mahkai lam mung n lu ai lam, mying n tsun mayu ai Garut Yang kahtawng masha langai Jinghpaw Shiga Dap KNG de tsun ai.

Shi hpe rim woi mat ai hpyen hpung hta, Myen hpyendap Sinna Dingdung Daw (N.M.Hk) npu Mung Ywa hkridun Hk.L.Y 87 hte Dingdung Daw Daju (M.P.Hk) npu dap hte Zahkung Ting Ying pyitusit ni lawm ai lam, lahta na salang wa tsun ai.

Slg. Kawn La hpe n rim mat shi yang, shawng e mung Garut Yang kahtawng masha langai hpang langai hpe ‘shawnglam majan lam madun’ hku nna Myen hpyen ni rim woi wa sai lam, shi matut tsun ai.

Ya ten, Garut Yang kahtawng salang ni gaw, gara de re n chye ai porter woi mat hkrum ai Slg. Kawn La hte seng nna shiga sagawn nga dingyang re lam chye lu ai.

Ma marai 6 a kaba Slg. Kawn La gaw hkauna galaw let nta masha ni hpe kan bau nga ai dinghku la rai nga ai lam chye lu ai.