Myen asuya dap hte KIA, shara lahkawng e gasat hkat

Myen asuya dap hte KIA, shara lahkawng e gasat hkat
Myen asuya dap hte Wunpawng Mungdan Shanglawt Hpyendap KIA lapran, July 18, mani shara lahkawng kaw gasat gala lam byin wa sai re.
Jinghpaw mungdaw dingda Manmaw ginwang, Manje, KIA Dapdung 12 ginra hte mungdaw sinna Kamai, KIA Dapdung 6 ginra, ni hta byin wa ai re.

Ndai shara lahkawng majan gaw, ‘ang katut gap gahpraw hkat ai lam sha re lam’ Laiza ginjaw KIO Shiga Htawn Shana Dap lit nga Dukaba Nhpang Naw Bu kaw nna Jinghpaw Shiga Dap KNG de ndai zawn tsun wa ai.

"byin gaw byin ai raitim majoi ang ga tut le. manit 10, manit 5 ram le.. Kamai, Htoi San Yang kaw Gauri maga de yu mat wa ai ni hpe grai wa gap hkat ai nre. Bawm shangoi la ai ram”

Myen hpyen hte Sam Hkyeng pyitusit ni jawn lung wa ai hpyen mawdaw 2 hpe KIA Masat 6 Dapdung hpyen hpung ni bawm hte hkap kapaw ai kaw Myen maga 1 si, 4 hkala ai lam, ginra masha ni kaw nna chye lu ai.

Bai nna, Manje, Kawng Ja hte Hkang Kai Hkyet lapran Zai Bru Tsun ngu ai shara kaw KIA Masat 12 Dapdung hte ai majan hta gaw Myen hpyen Hk.M.Y 521 dap na hpyenla 2 si ai lam, KIA shawnglam shiga lawk hku nna chye lu ai.

Mana shana mung, Hpakan, Ginsi hte Nam Ya maga nga KIA Dap ni de Myen asuya dap ni laknak kaba lang hte lang gap bun ai lam, sagawn chye lu ai.