Lahta Sam mung rudi amyusha ni ginlung let shawa n-gun madun

Lahta Sam mung rudi amyusha ni ginlung let shawa n-gun madun
Lahta Sam mung rudi Jinghpaw, Sam hte Balawng amyusha ni gaw hpyendap a ‘shinggyim ahkaw ahkang tawt lai hkrum nga ai lam hte simsa lam hte seng nna’ Lashu mare kaw asuya ninghkap n-gun madun ai lamang hpe July 16, mani galaw wa masai.
Lashu pyada dap kaw nna ahkang jaw ai hte maren, ginlung shawa n-gun madun poi hpe jahpawt hkying 9 kawn hkying 12 du hkra mare kata lam hkawm let galaw wa sai hte, masha n-gun 1,000 mi daram shanglawm wa sai re.

Ndai n-gun madun poi hte seng nna lamang woi awn ai hta shanglawm ai Jinghpaw Wunpawng Ramma Hpung, KYO (Sam mung) na Shd. Ze Dau gaw, “madung chyawm gaw mung shawa ni kaja na matu madung grau nna mung shawa ni nsen hpe madung shapraw mayu ai sha gaw rai ga ai. Madung majan byin taw ai ngu hta madung anhte ginra kaw madung katut sha taw ai re majaw anhte hkrai galaw ai re”

N-gun madun poi hta--- mung shawa ni wanglu wanglang hkawm sa hkawm wa let nga pra lu na matu, hpyen yen ni shimlum ai hte tinang ginra ni de bai nhtang wa lu na matu, tara upadi ka-up lam nga na matu, shinggyim ahkaw ahkang tawt lai ai lam jahkring kau na matu, rudi amyusha ni a lu gying lu ang ai mungmasa ahkaw ahkang jaw ai, jet ai munghpawm byin tai wa na matu, ndai lam ni hpe shapraw let hpyi mat wa ai lam, Shd. Ze Dau tsun ai.

Dai ginlung shawa n-gun madun poi de, madung Sam hte Balawng ni shanglawm nna Jinghpaw ni gaw marai 200 daram lawm ai lam chye lu ai.

Myen mung ting hte seng ai Sam ramma jinghkri, Sam ramma hpung, Jinghpaw Wunpawng Ramma Hpung (Sam mung), Balawng amyushayi hpung, Balawng jawngma hte ramma hpung ni ni jawm woi awn nna ndai n-gun madun poi galaw ai lam re.

Lahta Sam mung e asuya dap hte amyusha rawt malan hpung ni lapran gasat gala majan jahkring hkring byin nga ai hta, ginra buga masha gaw Myen hpyendap a shinggyim ahkaw ahkang tawt lai lam amyu mytu hkrum sha nga ai re. June 25 ya shani hta sha, Lashu, mara kata Mai Yaw kahtawng masha 7 gaw Myen hpyenla ni a sat kau ai lam hkrum sai rai nga ai.