Awng San Su Chyi hte hkrum na, UNFC ningbaw ni Yangon du

UNFC, amyusha hpyen masa mungmasa daphpawm, ningbaw Du Kaba Nban La woi awn ai amyusha rawt malan hpung ningbaw ni gaw, Mungdan Hpaji Jaw Salang, Slg.jan Awng San Su Chyi hte hkrum shaga na matu, July 16, bat Kru Ya shani Yangon mare de du wa sai re.


Hpawt ni UNFC ningbaw ni hte Slg.jan Su Chyi lapran Amyusha Gahkyin Gumdin hte Simsa Lam, NRPC rung daju e hkrum hkat na re.

Shaloi, UNFC maga bawng jahkrup mat na lam hte seng nna Daphpawm a Mungmasa Bawngban Kasa Hpung, DPN malawm, Duwa Bawmwang La Raw gaw, “ Zuphpawng kaw lung na rai jang anhte yawng gara hku shang lawm na ngu ni, ndai zuphpang a lachyum ni, federal mung hpawm mungdan byin tai na matu gaw gap hkat jahkring ra rai yang, gap hkat rai n jahkring ai laman anhte ni ganing ngu ga sadi tawn da na gap hkat jahkring ai lam galaw na, framework rau galaw na, zuphpawng hpe mung lamang hpe rau jum na yawng shang lawm hkra galaw na jahkrup na matu sa ai re law" nga Jinghpaw Shiga Dap KNG de tsun ai.

Du Kaba N’ban La hte rau zuphpawng hta shanglawm ai UNFC ningbaw ni gaw, Sam Mung Rawtjat Pati (Sam Mung Hpyendap), SSPP/SSA a ninghpum salang Du kaba Se Htin, Kayin Hkyeng Rawtjat Pati, KNPP a ningbaw Abel Tweed hte Mun Mungdan N’nan Pati, NMSP a ningbaw Nai Htaw Mun hte UNFC amu madu Hku U Re ni lawm ai rai nga ai.

Lai wa sai June praw 3, asuya a ‘Munghpawm Simsa Lam Zuphpawng- Tsaban 21 Panglong’ shabyin shatai komiti a ningbaw, Slgj. Su Chyi a masha, Dr. Tin Myo Win hte hpung ni Htai mung Chiang Mai e UNFC ningbaw ni hte hkrum sai. Shaloi, Awng San Su Chyi hte hkrum mayu ai lam UNFC ningbaw wa hpyi ai hte maren, ndai hkrum shaga ai lam byin wa ai re lam, Duwa La Raw tsun ai.

Bat Kru Ya shani UNFC ningbaw ni Yangon nbungli daru na pru wa ai shaloi, mung shawa ni gaw amyusha dawnghkawn, UNFC dawnghkawn ni hpai let, “Jet ai simsa lam galaw lu u ga, jet ai munghpawm lawan dik gawgap lu u ga,” ngu ka tawn ai laika pa ni hpai let hkaptau hkalum la ai lam hpe galaw wa sai re.

Ya ndai Mungdan Hpaji Salang, Awng San Su Chyi hte hkrum shaga lu ai mahtai hpe du na bat KIO Sinpraw Ginwang Ginjaw, Mai Ja Yang mare hta galaw na amyusha rawt malan hpung hkrumra zuphpawng e ahkyak shatai let myit mang bawngban sa wa na re nga, DPN salang Duwa La Raw matut tsun ai.

Ndai ten, Mai Ja Yang zuphpawng lawm na n teng shi ai, Balawng TNLA, Kokang MNDAA, Rahkai AA, Wa UWSA hte Mongla NDAA wuhpung ni zuphpawng de du lawm na matu, UNFC a ningtau ningbaw Slg. Nai Han Ta woi awn nna dai rawt malan hpung ni hpe sa zinlum nga ai lam, Duwa Bawmwang La Raw tsun wa ai re.