Lahta Sam mung Munggu de asuya hpyen n-gun jat
Lahta Sam mung Munggu, Wunpawng Mungdan Shanglawt Hpyendap KIA dapba 6 ginra de Myen asuya hpyendap gaw ndai shata praw kaw na shawoi na hta grau hpyen n-gun jat bang nga ai lam chye lu ai.
Lai wa sai masum ya daram kaw nna Myen Dap nu 99 kata hpyen hpung ni gaw Mung Baw hte Munggu lapran shawnglam dap ni de lusha jarik hte laknak ni matut manoi htaw shalai bang nga ai lam, Munggu mare masha langai Jinghpaw Shiga Dap, KNG de tsun ai.

“mu nan mu ai. Ya hte mawdaw 7 hte gumra the shang ai ni gaw anhte Ying La Bum de shang nna masha n gun wa jat da she, mani shawng shani ndai lapran hkan gaw ndai Ying La Bum kaw gumra 22 hte lu sha masum ya htaw bang ai da”

Bai nna, shawoi hpyendap n nga ai shara hkan mung Myen ni dap jahkrat wa ai lam, lahta na Munggu buga masha wa matut tsun ai.

“shawoi mung hkawm dingyang gaw re raitim ya dai Dumdu Bum hkan gaw mi gaw hkawm lai ai sha re le raitim ya gaw shara wa la ai ni nga wa sai”

KIA dap dung 36 hte 38, Munggu ginra hta shawng e asuya hpyen n-gun 300 daram sha nga ai kaw nna ndai July praw de n-gun 600 jan du nga sai hte, Dapba yawng ting rai yang 1,000 jan ai lam, Dapba 6 salang langai Jinghpaw Shiga Dap, KNG de tsun ai.