Myen hpyen shawnglam dap kata shada gap sat hkat

June 26 ya shani Munggu makau Namsu kahtawng makau kaw shada sat hkrum ai, dap hprawng myen hpyen la
Shawnglam e du nga ai Myen asuya hpyen hpung kata hpyen ma langai tinang tsang du jum langai hte rau hpyenla masum hpe, shat sha ten gap sat kau nhtawm laknak hte hpawn hprawng mat ai lam July praw 5, mani byin wa sai re.
Ndai mabyin gaw, Manmaw-Loije lam Sinlum Kaba mare kaw dap jung shara jahkrat tawn ai, Myen hpyendap Dingdung Daw Daju (M.P.Hk) npu Hk.L.Y 47 hpyen hpung kata byin wa ai lam re.

Laiza na KIO shiga dap lit nga Du kaba N’hpang Naw Bu gaw, “Myen hpyenla langai mi shanhte shat sha taw nga ai hpe gap nna Captain langai mi, hpyen ma masum dai hku hkala si mat ai nga. Captain langai, Tsazen langai hte dap ma lahkawng yawng shanhte 4 hpe gap sat kau nna sinat laknak hte hpawn hprawng mat ai nga shiga gaw lu la ai. Raitim gara maga de hprawng ai hpa majaw hprawng ai ngu gaw n chye shi ai” nga nna KNG Jinghpaw Shiga Dap de tsun ai.

Gap sat hkrum ai hpyenla ni a moimang hpe mani jang wan nat makoi mayang kau sai lam sagawn chye lu ai.

Bai nna, lai wa sai June 26 ya shani hta mung, Sam Mung, Munggu mare makau dap jung shara jahkrat tawn ai, Myen hpyen dapnu 99 npu, Hk.M.Y 14 kaw na, hpyen ma langai hprawng mat ai majaw, dai hpyen ma hpe Munggu makau Nam Su mare kaw shada hkan gap sat kau ai mabyin mung byin lai wa sai re.

Dai zawn sha, hpang shani June 27 shani hta mung, Munggu mare makau Man Pang kaw nga ai, Myen hpyen dapnu 99 npu, Hk.M.Y 15 kaw na hpyen ma langai, tinang hkum tinang sinat hte gap sat si mat ai lam, Munggu buga masha ni kawn tsun ai.