July 6, 2016 Myen-KIA Hpakan Majan

Hpakan lungseng maga Myen asuya dap hte Wunpawng Mungdan Shanglawt Hpyendap KIA Dapdung (6) lapran, dai hpawt daw gasat gala majan byin wa sai re.

Nam Ya hte Hpakant lapran Kap Maw mare lai, Kum Tsai Zup mare makau KIA hkap sin shara hpe Myen ni shawng sa gap gasat ai kaw nna majan byin wa ai re lam KIA shiga ni tsun ai.
 
Ndai majan hte seng nna, ginjaw Laiza na KIO shiga dap lit nga ai Du kaba Nhpang Naw Bu gaw ‘Thada Nyi Nawng maga de dai hpawt hkying kru chyen kaw nna majan byin ai’ nga nna Jinghpaw Shiga Dap KNG de tsun shateng ai.
 
Asuya dap maga Dingda Sam mung, Sinpraw Daw Daju (Y-P-Hk) kata S.K.Hk.-7 (Hpe Hkung) npu Hk.L.Y 107 hte Hk.M.Y 427 ni re lam chye lu ai.
 
Manap hkying kru chyen kaw nna byin hpang wa ai majan gaw hkying 10 daram du hkra byin nga ai re. Dai hta Myen maga marai (5) si nna hpyendu madang (1) mung hkala hkrum ai lam shawng lam shiga kaw na chye lu ai.
 
Lai wa sai May praw (5) kaw nna bat mi jan, asuya dap hte Nam Ya, Sam Hkyeng Pyithusit hpung ni pawng nna, Nam Jan Hku KIA dung (6) daju hpe maja n-gun hte gasat wa ai hta KIA ni htingnut kau ya sai re.
 
Bai nna Laiza maga mung, Nam San Yang mare makau dap galai gachyai hte hpyen shamu shamawt hkawm ai asuya dap ni hte KIA hpyen hpung ni June (25) ya shani kaw nna July (1) du hkra Lazing Kawng mare makau gasat gala majan ni byin nna, Myen dap maga si hkala ai marai (150) jan na re lam KIA shawng lam shiga ni tsun ai. KIA maga hkala nba hpa n nga ai lam chye lu ai.
 
Asuya n’nan woi galaw nga ai amyusha rawt malan hpung ni yawng shanglawm ai Tsaban 21 Panglong zuphpawng hpe du na August shata galaw hpang na shakut nga ten, Jinghpaw ginra ni hta gasat gala majan ni kaba wa nga ai re.