KIA hpyenla, Munggu ginra, Lahta Sam mung

Lahta Sam mung, KIA Dapba 6 Munggu ginra de hpyen n-gun jat lung wa ai Myen asuya hpyen hpung langai hpe KIA mungshawa hpyen hpung ni kaw nna, shara lahkawng hta bawm hte hkap gasat sai.

Mung Baw maga kaw nna Munggu de lung ai Myen Dapnu 99 npu Hk.M.Y 113 hpyen hpung hpe, Pangsai (Kyukok) mare lai Nam Ba Tek e July praw 2 ya shana de kalang hte hpang shani July praw 3 hta Hka Lum makau e kalang rai, KIA MKM (Mungshawa Kanawn Mazum) hte MHH (Mungshawa Hpyen Hpung) ni bawm hte hkap kapaw ai re lam, KIA Dapba 6 salang langai KNG Jinghpaw Shiga Dap de tsun shateng ai.

Myen hpyendap n-gup Myawady shiga hta, ‘Munggu de lung ai tinang hpyen hpung hpe KIA ni bawm hte hkap gasat ai lam shiga ni’ tang madun wa sai re.

Matut nna, Myen asuya dap hte KIA Dapba 6 lapran Munggu ginra e gasat gala majan ni dingyang byin wa masa nga ai lam hpe KNG Jinghpaw Shiga Dap sagawn chye lu ai.