Awng San Su Chyi (pai) hte Dr. Tin Myo Win

Jaw Prat 21 Panglong zuphpawng galaw sa wa na lam hkyen lajang komiti hte komiti lakying (sub-komiti) ni hpe hpaw dat sai lam, Myen asuya gaw May 31 nhtoi hte ndau dat sai.

Slg.jan Awng San Su Chyi woi awn ai Amyusha Democracy Ginjaw pati, NLD gumsan magam Slg. Htin Kyaw woi ningbaw ai asuya lung wa ai shata lahkawng e ndai ndau pru wa ai re.

Munghpawm Simsa Lam Hkrum Ra Zuphpawng- Jaw Prat 21 Panglong, hkyen lajang komiti hpe malawm (17) hte hpaw dat sai. Malawm hku nna, Slg.jan Su Chyi lata ai Dr. Tin Myu Win woi ningbaw ai hte hpyendap na Masat (2) Laksan Hpyen Gasat Hpung ningbaw Lat Du Daju Jum Ya Pyi, Masat (4) Laksan Hpyen Gasat Hpung ningbaw Lat Du Daju Jum Min Nawng yan lawm ai. Jinghpaw salang masum--- Manau Shadung Pati (UDPKS) na Slg.jan Doi Bu hte Slg. Hkyet Hting Nan yan hte, NLD pati na Slg.jan Shi La Nang Tawng (snr) M. Nang Tawng, ni lawm re.

Dai komiti npu, Mungdan Ting Gap Hkat Jahkring Ga Sadi, NCA sen htu ai amyusha rawt malan hpung ni hte hkrum na laksan komiti lakying-1 (sub-komiti 1) hpe malawm (15) hte hpaw nna, dai komiti a ningbaw gaw Du Kaba Ya Pyi rai nna ningtau ningbaw gaw KNU Ninggawn Amu Madu, Padu Saw Koi Htu Win re.

EAOs (Ethnic Armed Organizations), ngu ai NCA sen htu ai rawt malan wuhpung (8) gaw – Karen wuhpung masum (KNU, DKBA, KNU/KNLA PC), Rahkai ALP, Myen jawngma dap ABSDF, Sam RCSS, Pa-O PNLO hte Hkang CNF, ni rai ma ai.

Bai, NCA sen n htu ai amyusha rawt malan hpung ni hte hkrum na laksan komiti lakying-2 (sub-komiti 2) hpe malawm (9) hte hpaw nna, komiti lakying a ningbaw gaw NLD masha Dr. Tin Myu Win rai nna hpyendap na salang lahkawng (2) (kadai re ai n chye shi) shanglawm na re. Hpyendu dingsa Ting Zaw hte La Mawng Shwi yan lawm nna, Slg. Hkyet Htingnan hte Slg.jan Doi Bu yan mung shanglawm ai.

Ya ten NCA sen n htu shi ai wuhpung (13) gaw – KIO (Jinghpaw), NMSP (Mon), KNPP (Karenni), SSPP/SSA (Sam), TNLA (Balawng), ANC (Rahkai), AA (Rahkai), MNDAA (Kokang), NDAA (Sam), LDU (Lahu), NSCN-K (Naga), UWSA (Wa) hte WNO (Wa) ni re.

Wunpawng Mungdan Shanglawt Hpung, KIO gaw NCA sen n htu ai raitim dai hpe madi shadaw ai NCA nhprang hpe gaw, dai ten KIA Tau Dap Awn Daju hte KIO Maigan Kyithkai Lithkam, Du Kaba Sumlut Gun Maw, May 31, 2015 hta Yangon MPC (Myanmar Peace Center) rung e sen htu sai re.

Lai wa sai April shata asuya n’nan lung wa ai hte rau, KIA hte Myen hpyendap lapran bai byin wa ai gasat gala majan ni lani hte lani laja wa ai re. Raitim KIO ginjaw gaw asuya n’nan hte mungmasa jahta lu na myit mada ai hte Du Kaba Sumlut Gun Maw woi awn ai, Jinghpaw ginra buga shara shagu de na mungshawa salang malawm 30 jan shanglawm ai wuhpung hpe hpaw dat sai re.

Dr. Tin Myu Win woi awn ai, NCA sen n htu ai wuhpung ni hte hkrum na komiti lakying-2, dat kasa ni gaw, June praw 2, hpawt ni Htai mung Chiang Mai mare hta UNFC, amyusha hpyen masa mungmasa daphpawm salang ni hte hkrum na re lam chye lu ai.

Ya na zawn asuya simsa lam dat kasa ni hte n hkrum shi yang, UNFC gaw daini June praw 1, Bat Langai Ya shani Chiang Mai mare hta zuphpawng galaw taw nga sai re.