Asuya n’nan lakhtak majan grau kaba wa na lam KBC ndau

KBC myitkyina ginjaw rung

Myen asuya ningnan lakhtak mung, shawng na asuya zawn sha majan grau laja wa na masa re lam Jinghpaw Wunpawng Hkalup Hpung Ginjaw (KBC) kaw nna mungdan kata shinggan tinang nawku hpung ni de May 24 ndau hte shana lajin dat sai re.

Jinghpaw nawku hpung ni hta kaba dik KBC ginjaw a ndai ndau e ginlam (6) lawm nna shawng ningnan, asuya ningnan lakhtak majan grau kaba wa na lam hpe ya na zawn shadum dat ai.

“Myen mungdan gaw 2016 ning April shata kaw na asuya nnan galai sai raitim anhte Wunpawng sha ni nga ai buga ginra ni hta majan matut manoi byin nga ai. Myen hpyen dap a htu sit shang kaup ai lam grau law wa ai. Moi na hte n shai ai grau laja wa na zawn byin nga ai.”

Bai nna Wunpawng myusha ni hpyen yen dabang ni hkan nga ai gaw 2016 June shata 9 ya hta manga ni hpring sai re. Ya ten mungkan mungdan ni a karum madi shadaw lam ni grau grau yawm mat wa ai majaw hpyen yen dinghku ni hta mayak ni grau law wa ai lam tsun da ai.

Dai re majaw Jinghpaw ginra (Jinghpaw mungdaw hte lahta Sam mung) ni hta majan 5 ning hpring nhtoi shani tinang buga hte ni nawn ai buga ni rau pawng hpawn rai alak mi lusha gam kyu hpyi na matu lajin dat ai re.

Wunpawng Mungdan Shanglawt Hpung, KIO hpe simsa lam lakmat htu na matu KBC ginjaw kaw na tsun ya na matu Hpyendap Daju (Hkarang), Masat (1) Laksan Hpyen Majan Masing up Lat Du Daju Jum Htun Htun Nawng gaw April praw 7 ya shani Myitkyina KBC ginjaw rung de sa du tsun shadut wa sai.

Amyusha Democracy Ginjaw, NLD asuya lung wa ai bat mi kaw nna Myen hpyendap gaw Wunpawng Mungdan Shanglawt Hpyendap, KIA hpe gasat wa ai gaw dai ni du hkra rai nna Manje KIA dap ni hpe gaw May 17, 18 ya shani jet nbungli hte majan helicopter ni hte wa gap gasat sai re.

KIO gaw asuya hte mungmasa jahta na hkyen nga ten, Hpakan, Waimaw hte Manje gaiwang kata asuya dap ni a grau grau majan baw gasat ai lam ni hpe mung hkrum nga ai re.