Jan Bawk Ja hpa majaw NDF pati na pru mat a ta?

Amyusha Democracy Hpung (NDF) pati, Jinghpaw Mungdaw ningbaw Jan Labyawng Bawk Ja gaw shi a pati kaw nna tsep kawp pru mat ai ginlam mali nga ai lam tsun wa sai.

Tinang amyusha lam hta wanglu wanglang galaw lu na matu, n tara zing madu la hkrum ai lamu ga ni hpe tara masa kata bai lu la hkra galaw lu na matu, yi sun hkauna galaw shawa ni a rawt jat galu kaba lam hpe ta tut hkrang shapraw galaw lu na matu hte pati mying gang nna tingkyeng akyu tam na myit n rawng ai a majaw re lam, Jan Bawk Ja Jinghpaw Shiga Dap KNG de tsun ai.

Ya yang Jinghpaw Mungdaw kata Hugawng ginra Yuzana company kaw nna zing da ai lamu ga ni hpe bai lu na matu, Mali-N’mai Zup hka madim masing tsep kawp hkring mat na matu hte Putau ginwang Machyang Baw Nlung Lapu zing la hkrum ai hpe mi na raw bai lu na lam ni hpe tara masa hku nna shi madung dat galaw mat na re lam tsun ai.

Pati kaw nna pru na lam laika hpe pati ginjaw mu gun komiti de May praw 7 ya shani shagun dat nna, hpang shani praw 8 hta pru hkring sa mat ai re lam chye lu ai.

Jan Bawk Ja gaw NDF pati a mungshawa rapdaw dat kasa hku nna 2010 ra lata poi hta Hpakan ginwang hte 2015 hta Myitkyina ginwang, ni hta shang shingjawng wa sai raitim n dang ai re.

Lamu ga n tara zingla hkrum ai mungshawa ni maga tara masa hku nna tsap ya ai majaw, tara kasa langai mung rai nga ai, Jan Bawk Ja gaw Jinghpaw Wunpawng amyusha ningtawn kumhpa 2 shagrau hkrum sai re. Union of Kachin Communities in Europe na shagrau ai ‘The Kachin Civilian Defender (Mung Masa Ninggang)’ hpe 2011 hta lu nna, Amerikan Mid-Atlantic Jinghpaw Hkristan Nawku Hpung na shagrau ai ‘Myusha Gintawng’ kumhpa hpe gaw 2012 hta hkap la lu sai re.