Ya kalang bai, Myen asuya dap hte Wunpawng Mungdan Shanglawt Hpyendap, KIA lapran, shani shagu ngu na gasat gala majan ni byin shajang nga ten, Mali Hka mayan Da Law-Hukat Lam de mung hkrum katut gap gahpraw hkat ai lam ni nga nga ai hpe chye lu ai.

Jinghpaw mungdaw ga-ang, Mali Hka a sinpraw hkran Da Law snr Tharlawgyi hte Hukat mare makau ni hta mani hte mani shawng shani, May praw 4 hte 5, wuhpung lahkawng dap lapran aten kadun hkrum katut gap hkat ai lam ni nga ai hpe shanglawm ginra shiga lawk ni tsun ai.

Mali Hka a sinna hkran Myitkyina mare daju a npu deng 21 jan gang ai ndai Da Law-Hukat Lam gaw Mali Hka sinpraw hkran Miwa ga jarit mayan KIO/KIA ginra de Myen asuya hpyen hpung kaba htu shang wa ai chyinghka hku kaba langai re.

Lai wa sai Marh shata htum wa de, ndai chyinghka hku kaw nna Myen hpyen n-gun 2,000 jan gaw Laiza, KIO/KIA ginjaw ginra de htu shang wa ai lam, KIA shiga lawk tsun ai.

April shata Hka Jaw Poi du na mahka hte ngut ai hpang, dai ginra hte matut ai KIA Dapba 5 npu Dung 18 ginra, Ban Dawng hte Nam San Yang makau na shawnglam post mali hpe mung, Myen asuya dap ni n-gun kaba hte gasat zing ai lam ni galaw wa sai re.

March shata htum kaw nna, mung shawa ra lata ai Amyusha Democracy Ginjaw Pati, NLD asuya lung wa ai hte rau, Myen hpyendap gaw Nam San Yang a sinna maga pa daw, Myitkyina-Manmaw Lam hte Mali Hka lapran hta KIA dap ni hpe ye shapraw kau na hpyen majan masing galaw wa ai re lam, KIA ginjaw tsun ai re.