2016 climate change myithkrum sen htu lamang

Du hkra ladaw hte seng ai myit hkrum ga sadi hpe mungdan 175 na dat kasa ni hkap la sen htu ai lamang hpe April 22 (sinna mung ten) New York mare Mungkan Wunpawng Hpung UN rung daju galaw wa sai re.

 
Myit hkrum ga sadi hta ya byin nga ai mungkan gahtet wa ai lam (global warming) hte du hkra ladaw galai shai wa ai (climate change) hpe ninggam shayawm kau lu na matu yaw shada let, maning 2015 December Paris mare zuphpawng e mungdan 190 jan myit hkrum da ai rai nga ai.
 
UN ninggawn amu madu kaba Slg. Ban Ki Mun tsun ai hta “mungdan shagu na ningbaw ni hpe du hkra ladaw galai shai wa ai hte seng nna lawan ai hku hparan shangun mayu ai. Hpa majaw nga yang ndai gaw anhte a kashu kasha ni hte lamu ga a matu ahkyak nga ai majaw” re lam tsun ai.
 
Bai nna Paris zuphpawng shaloi shanglawm ai ma kaji 197 mung ndai sen htu ai lamang e matut sa du ai hta “anhte myit hkrum sen htu ai gaw ndai ma ni a shawnglam re” nga Slg. Ban Ki Mun matut tsun ai.
 
Lai wa sai 1970, April 22 ya shani Amerika kaw na hpang wa ai ‘Ginding Aga Nhtoi’ gaw ya 46 ning hpring sai re. Mungkan hpe grau grau kahtet shangun ai hte du hkra ladaw galai shai shangun ai madung dat nsa, Carbon Dioxide hpe shapraw dik htum ai mungdan ni yawng shanglawm let mungkan labau shang sen htu ai lam mung rai nga ai.