Ginding Aga Nhtoi 2016

Daini gaw Ginding Aga Nhtoi re!

Ndai nhtoi lamang ni hpe “Trees for the Earth”, “Let’s get planting”, “tsit lali ai GINDING AGA… hpun jawm hkai ga” ngu ai gabaw hte mungdan shara shagu galaw nga ai re.

Amerikan mungdan hta hpang ai ndai nhtoi hpe Mungkan Wunpawng Hpung UN kaw nna mung ‘International Mother Earth Day’, Mungdan Gadaga Kanu Ginding Aga Nhtoi ngu masat let ndau laika shapraw dat ai re.

Ndau hta “hten za ai grupyin shingra e asak hkrung ai (shing n rai) amu galaw ai majaw, 2012 ning laman si ai masha wan 12.6 re lam maram tawn ai. Dai gaw mungkan shadang si ai 4 hta 1 hkawt re” nga tsun ai.

Shingra tara hten za shangun ai lawnglam ni gaw--- nbung n san seng ai lam (pollution), shingja tsi baw ayai ai lam (chemical exposures), du hkra ladaw galai shai lam (climate change) hte dat shingkang (radiation), ni a majaw ana hpan 100 jan mungkan shara shagu byin jawng nga sai re.

N kaja ai grupyin shingra a majaw byin pru ai ana ahkya ni shayawm kau lu na matu tinang nga ai, tinang amu galaw ai shingra ni hpe grau mai kaja hkra galaw na matu April 22 daini ang ai Ginding Aga Nhtoi e Mungkan Wunpawng Hpung lajin tawn ai re.

UN Ninggawn Amu Madu Kaba Slg. Ban Ki-moon tsun ai hta, “Daini ang ai Kanu Ginding Aga Nhtoi e anhte masha shagu myit yu na matu lajin mayu ai gaw, anhte lata galaw ai hte maren de a akyu ni dinghta ga ntsa mu lu na re majaw de a akyu ni hpe htawm na ban ni hkam sha na re.”

Daini (sinna mung ten) UN rung daju New York e Du Hkra Ladaw Galai Shai Lam (Climate Change) hte seng ai 2015 Paris Myit Hkrum Ga Sadi hpe mungdan 170 jan na dat kasa ni sen htu shagrin na rai nga ai re.