Hpawng Seng de Myen hte KIA, hkying hkum mi gap hkat

Munggu ginra KIA hpyen hpung ni

Dai hpawt jau Lahta Sam mung KIA Dapba 6 ginra Hpawng Seng mare makau e Myen asuya dap hte aten hkying hkum mi dang gap hkat wa sai re.

Myen hpyen Dapnu 99 ngu maram lu ai hpyen hpung hte tinang KIA Dung 38 lapran Hpawng Seng makau, Nawng Jang hte Man Yang lam numshe e jahpawt  hkying 5 daram kaw nna gap hkat ai lam, mying n tsun mayu ai KIA Dapba 6 lahta tsang salang langai KNG Jinghpaw Shiga Dap de tsun shateng ai.

Ndai majan gaw, lai wa sai February shata Dapba 6 hpe Munggu ginra e tara shang hpaw ai hpang nambat langai lang laja lana byin ai gasat poi re lam chye lu ai.

Jinghpaw mungdaw KIO/KIA ginjaw ginra makau, Ban Dawng hte Nam San Yang, KIA Dung 18 ginra kata Hka Jaw Poi n du shi ai aten hte ngut ai hpang, Myen dap ni n-gun kaba hte htu gasat wa ai, de a majaw KIA shawnglam post mali hpe yen kau ya sai re.

Myen mung kata NLD woi ai mung shawa asuya lung wa ai nhtoi at masum jan ten, Myen asuya dap hte gasat gala lam ni gaw Jinghpaw, Sam hte Rahkai mungdaw masum e byin nga ai re.