Mali N'mai Walawng ginra

Jinghpaw amyusha ginru ginsa Uma Ga de laklak lailai lamu marang hkrai htu na dai ning yi n lu nat shi ai lam chye lu ai.

Lai wa sai February shata kaw nna dai ni April 18 ya du hkra, jan mai ai lahkawng ya daram sha re majaw buga masha ni malawng maga yi n lu nat shi ai lam, ginra buga masha ni tsun ai.

Jinghpaw mungdaw ga-ang, Wunpawng Mungdan Shanglawt Hpung KIO uphkang nga ai Uma Ga, Mali-N’Mai Walawng hte Mali-Hkrang Walawng hta mung masha hkying lam nga nna shanhte hkarang yi madung galaw sha nga ai re.
 
Jan lahkawng ya mai ai ten, nkau yi nat lu ai raitim atsawm n hkru ai lam chye lu ai. Dai re majaw du na shata May du hkra yi n lu nat jang gaw, malu masha yak hkak wa na re lam chye lu ai re.
 
Mali Hkrang Walawng, Mali Yang de nga ai hpyen yen masha ni (IDPs) hpe gaw Jinghpaw Wunpawng Hkalup Hpung Ginjaw KBC kaw nna malu masha tsi mawan ni garum jaw nga ai re.