Jinghpaw pati pawng gahkyin lam shawng de ninggam mi bai jat

KDP ningbaw Slg. Gumgrawng Awng Hkam (pai), KSDP ningbaw Dr. Manam Tu Ja (ga-ang) hte KNCD ningtau ningbaw Dr. Chyauchyi Awng Dun

Jinghpaw pati masum pawng gahkyin na lam shawng de ninggam mi bai jat ai hku nna, ja gumhpraw tam sub-komiti hpe hpaw dat lu sai re.

Malawm sanit ja gumhpraw tam sub-komiti hpe April praw 9 ya shani Myitkyina, Jinghpaw Mungdaw Democracy Pati (KSDP) rung daju e shawng n’nan lang galaw ai, pati pawng gahkyin lam amu gun komiti zuphpawng e hpaw dat ai lam re.

Yaw shada ai gaw, asuya hte n gindun ai Jinghpaw pati masum-- KSDP, Jinghpaw Wunpawng Democratic Pati (KDP) hte Jinghpaw Wunpawng Amyusha Democracy Rapdaw Pati (KNCD) pawng gahkyin ai bungli hta ra kadawn nga ai ja gumhpraw tam ya na matu re.

Ya shawng n’nan gaw pati masum kaw nna sub-komiti de Myen kyat sen 5 hpra bang jaw na matu bat Kru Ya shani amu gun komiti zuphpawng e daw dan ai lam, KDP ningbaw Slg. Gumgrawng Awng Hkam tsun ai.

KSDP, KDP hte KNCD pati ningbaw ni gaw April praw 2 ya shani KDP Du Mare rung hta zuphpawng galaw nna pati masum pawng hpawng na matu ‘masa’ hku nna myit hkrum sai hte, ta tut hkrang shapraw sa wa na matu ‘amu gun komiti’ hpe mung dai shani hpaw dat ai re.

Maning 2015 November ra lata poi hta, Wunpawng Mungdan Shanglawt Hpung, KIO Tingnyang-up Malai 2 hkringsa Dr. Manam Tu Ja woi awn ai KSDP pati gaw Mungdaw rapdaw shara 3 hte Mungdan lawu rapdaw (pyithu hluttaw) shara 1 mi hta dang ai. Ngam ai pati yan shara mi hta mung n dang ai re.

Ra lata poi n du shi ai aten e mung, pati pawng gahkyin ai lam hpe Sara Lamawng La Tawng, Mung Shawa Nsen Shapraw Komiti-Hpakan Ginwang, woi awn nna lang hte lang zuphpawng shaga galaw wa yu sai re. Raitim KDP hta lai, ngam ai pati yan n shanglawm wa ai majaw pati pawng gahkyin na lam n byin mat ai re.

Raitim, ndai kalang pati pawng gahkyin ra ai lam hpe pati masum gaw ‘masa’ hku myit hkrum let galaw sa wa ai majaw dai lam ntsa mung shawa ni n-gun jaw madi shadaw ai hpe mu lu ai re.