tsirung de machyi masha htaw sa wa nga yang

April 12-16 du hkra galaw na Thinggyan (Hka Jaw Poi) hpang ai lahkawng ya hta sha, Myen hte Htai mung kata Hka Jaw Poi pyaw hkawm ai mung masha si hkala hkrum ai jahpan grau grau jat wa nga sai re.


Myen mung Mandalay hta sha poi laman mawdaw sengke adawt, shada adup hkat re majaw tsi rung du ai hkala hkrum masha marai 250 jan rai nna, si ai gaw marai 7 du sai lam Mandalay shiga lawk ni hta mu lu ai.

Bai nna htingbu Htai mungdan Hka Jaw Poi hta April 12, mani na laman marai 52 si nna, 431 gaw hkala hkrum ai lam Htai asuya pyada dap ni tsun ai re.

Si hkala hkrum ai ni hta 36.7% gaw mawdaw ladu lai shachyang gau ai majaw rai nna, 26.9% gaw tsa chyaru nang let gau ai majaw re lam pyada ni tsun ai. Bai nna laga 80% lawu gaw sengke adawt ai majaw re lam chye lu ai.

Matut nna Myen mung mare kaba Yangon Hka Jaw Poi hta gaw manghkang n byin na matu pyada n-gun 8,000 hte shimlam jaw nga ai lam chye lu ai.

‘El Nino’ ngu ai du hkra ladaw ladu lai gahtet jat wa ai majaw Myen hte Htai mungdan asuya gaw dai ning Hka Jaw Poi hpe ‘mandat’ shayawm kau sai hte hka jaw ai lamang hpe mung aten masat kau sai re.