Lusha sha shut nna Mugawng ramma 87 tsi rung du

tsi rung rawng ramma ni hpe kyu hpyi ya nga yang

 

April 11, mana de daw Mugawng, San Petru Hkatawlik Nawku Hpung a ginhtawng nsi note (music) hte Inglik grammar sharin hpawng lung nga ai ramma 87 gaw lusha sha shut nna tsi rung du ra ai lam chye lu ai.

 
Sharin hpawng lung nga ai ramma 123 gaw mana de ‘U Di Shat Mai’ hte shana shat sha ngut ai hkying 5 hpang kaw nna ramma nkau bawsin, madawn, hkum gaya ai lam ni byin wa ai majaw Mugawng mungshawa tsi rung de lung ra mat ai re lam dai nawku hpung amu madu gaw Jinghpaw Shiga Dap KNG de tsun ai.
 
Dai hta mana hkying 9 hpang hkam kaja wa sai hte tsi rung kaw nna yu mat wa ai ramma ni hta marai 30 jan gaw dai ni, Lahkawng Ya jahpawt manap shat sha ngut ai hpang bawsin, madawn ai lam ni bai byin wa ai majaw tsi rung bai lung ra ai lam Mugawng Shi Pinra hku chye lu ai.
 
Lusha sha shut ai mabyin madung gaw Miwa ga jarit na shang ai U Di hta dat gung lama ma rawng ai majaw rai na re lam hpe pyada hte tsi du ni tsun nga ai lam chye lu ai.
 
Jinghpaw mungdaw kata, Miwa ga jarit na shang ai, manu hpa ai lusha ni hpe madung mari sha nga ai sha n nga, kaga arung arai ni ma hkra ngu na mung mari lang nga ai re.
 
Dai re majaw, Miwa lusha sha shut ai lam ni mungdaw kata jahkring hkring byin ai raitim, seng ang ai asuya hkamja dap hte ahkaw ahkang lu ai ni gaw dai hpe ahkyak n la yu shalai tawn ai rai nga ai.