Zika ana kap ai num lahkawng Vietnam ndau

Zika ana byin shangun ai Aedes jigrawng

 

Vietnam mungdan e num lahkawng hta jigrawng kawa nna byin ai Mak Hkalawng Chyang kumla hte bung ai, ‘Zika virus’ ana byin taw sai hpe asuya Hkamja Dap kaw nna mani April 5 hta ndau dat sai re.

 
Nha Trang ngu ai panglai makau mare na asak 64 ning gumgai langai hte Ho Chi Min mare kaba na asak 33 ning ma hkum hte kanu num re.
 
Shan gaw March shata htum wa de hkum gahtet ai hte hkum gaya wa ai majaw masum lang tsi jep yu yang Zika ana kanu rawng ai hpe mu ai lam chye lu ai.
 
Raitim, yan ten dai kanu num yan hkam ja wa sai hte shan hte seng ai nta masha ni hpe mung jep yu ai shaloi ana n mu ai lam asuya ndau hta tsun sai.
 
Ndai Zika ana gaw masha kaba ni hta byin yang hpa n byin tim, ana kap ai kanu kaw nna shangai wa ai ma gaw bawnu n hpring ai sha shangai wa ai re.
 
Asha dan kata Miwa, Htai, Dingda Korea, Bangladesh hte ya Vietnam du hkra Zika ana chyam bra nga sai re.
 
Maning kaw nna ndai Zika ana dingda Amerika, Brazil mungdan e laja lana chyam bra wa ai hta, ya ten mungkan shara shagu de chyam bra nga sai lam, Mungkan Wunpawng Hkamja Dap (WHO) tsun ai re.
 
Zika ana hte seng nna makawp maga tsi (vaccine) hte shamai shatsai tsi ni ya ten du hkra n nga shi nna galaw shakut nga dingyang naw rai nga ai re.