Daphpawm ningbaw tai mayu ai lam UWSA tsun

Panghkam zuphpawng

 

NCA simsa lam ga sadi sen n htu ai Miwa ga jarit mayan amyusha rawt malan hpung 7 a March 26-28 Pang Hkam zuphpawng e ‘Wa’ UWSA gaw amyusha rawt malan hpung a ningbaw tai mayu ai lam tsun shapraw dat sai re.

 
Dai lam hte seng nna Wunpawng Mungdan Shawnglawt Hpung KIO Tingnyang up malai Du Kaba N Ban La gaw March 31 ya shani KIA masat 3 hte 4 dapba daju Mai Ja Yang e galaw ai dap shawa mungshawa sanglang hpawng hta tsun wa sai re.
 
Pang Hkam zuphpawng hta UWSA kaw nna amyusha rawt malan hpung ni hpe woi awn mayu ai lam tang shawn wa ai hta gara hku woi awn na masing hpe bai san ai shaloi, hkrak n chye tsun ai lam chye lu ai.
 
Ya na zawn amyusha rawt malan hpung ni hpe woi awn mayu ai lam hpyi shawn wa ai gaw UWSA a labau hta laklai ai hte shawng ningnan lang rai nga ai.
 
Dai zawn byin ai gaw, daphpawm hpe shaning galu woi ningbaw nga ai KIO, ginjaw a ‘mungmasa hpunda’ hkrat ai kumla re lam, daphpawm hte seng nna hka ja yu maram ai ni tsun nga ma ai re.
 
Lama na UWSA hpe daphpawm a ningbaw shara hkap la dat yang gaw, shi a shingdu e Miwa nga ai majaw shi woi dun na hpyen masa mungmasa gaw ‘kummyunit lam masa’ hku sha rai na re lam, yu maram lu ai re.
 
Lai wa sai 1989 ning Myen Mung Kummyunit Pati (CPB) ga ayai mat nna, UWSA hpaw ninghtan ai shaloi si na hkrung na ra kadawn nga ai ja gumhpraw hpe KIO garum yu sai re.
 
Myen mung amyusha rawt malan hpung daphpawm a labau hpe yu yang, NDF hpe Kayin KNU hte Jinghpaw KIO woi awn nna 1975 ning hta hpaw wa sai. 1994 ning hta, dai NDF kata KIO woi awn ai Myen asuya hte simsa lam la ai hpung hte KNU woi awn ai simsa lam n la ai hpung ngu, ga garan nna daphpawm hten mat sai re.
 
Ya kalang bai UNFC amyusha hpyen masa mung masa daphpawm hpe KIO woi awn nna 2011 hta hpaw dat sai. Raitim NCA simsa lam sen htu ai hpung hte n htu ai hpung nga nna bai ga garan mat ai gaw ya ten du hkra re.
 
UNFC daphpawm kata, Lahta Sam mung e daju ai Balawng TNLA hte Kokang MNDAA ni gaw KIO woi ningbaw ai hpe n kam ai n hkap la ai lam ni madun nga ai hpe sagawn chye lu ai re.