Myen hpyen la, shawng lam majan pa shara mi hta

 

March 29, bat Lahkawng Ya shani bai, Lahta Sam mung, Sam hpyen dingdung SSA-N dap hte Myen asuya dap lapran KIA dapba 6 ginra e hkying hkum 5 daram kahtap gap hkat ai hta, Myen ni shada da laknak kaba gap hkra ai lam chye lu ai.

 
Majan gaw Mungbaw, N Ga Hka Zup hte Hpa Ra Pa lapran e byin ai rai nna SSA-N dapba 1 hpyen hpung hpe asuya dapnu 99 gaw hpyen man lahkawng hte jahpawt daw hkying 11 kaw nna shana de hkying 4 daram du hkra gasat ai lam KIA ba 6, du kaba langai Jinghpaw Shiga Dap KNG de tsun ai.
 
Shawng lam hta SSA-N hpe gasat taw nga ai asuya dapnu 99 hpyen hpung hpe Man Jak e nga ai Myen dap ni laknak kaba myawk 82 mm hte gap garum ai hta myawk si 2 gaw Myen dapnu 99 shara la da ai kaw wa hkrat kapaw ai majaw Myen marai 10 jan hkra hkala mat ai lam dai KIA du kaba tsun ai.
 
Lahta Sam mung hta asuya dap hte SSA-N hpyen hpung ni gaw March 28 ya shani mung dai ginra makau kaw gasat poi byin wa sai re.
 
Bai nna March 26-28, Wa mung Pang Sang e galaw ai Miwa ga jarit mayan amyusha rawt malan hpung ni a zuphpawng kaw nna ya yang Sam hpyen dingda RCSS hte Balawng dap TNLA ni lapran gasat hkat ai lam lawan ai hku jahkring na tsun shadut dat sai. Lama na maga ga manghkang bai shabyin ai rai yang, amyusha rawt malan hpung ni rau jawm pat hkum sa wa na re lam, sadi jaw dat sai re.