KIA soldier in frontline
.
 

Lahta Sam mung Mung Baw, Man Nawng Ya mare makau hta KIA Dung 37 maga MHH mungshawa hpyen hpung ni lawm nna, Myen asuya dap hte dai hpawt hkying 9 daram kaw nna aten kadun gap hkat wa sai re.

 
Gap hkat wa ai mabyin hpe Wunpawng Mungdan Shanglawt Hpyendap KIA Dapba 6, lit nga hpyendu langai Jinghpaw Shiga Dap KNG de ya na zawn tsun ai.
 
“Dai Mung Baw, Man Nawng Ya ngu ai shara anhte Dung 37 ni nga hkawm nga yang dai Sam dap (RCSS/SSA) ni anhte gara de nga yang gara de hkan nga rai na sinat ni gap shangoi hkawm rai. Myen gaw dai ni hte rau rau nga hkawm rai. Anhte de na ni gaw hka sa ja nga na marai 3 lai bang wa ai hte Myen dap ni lapran kaw shang rai nna anhte ni hpe hkap shachyut gap rai na kachyi mi sinat gap shangoi hkat ai. Anhte de na ni gaw hpa n ra ai. Dai na de bai du wa sai.”
 
KIA kaw nna asuya dap ni hte ding dung Sam dap (RCSS/SSA) ni gaw hpyen masa hku nna rau shamu shamawt hkawm nga ai lam tsun taw tim, Sam dap (RCSS/SSA) ningbaw Yawd Serk gaw shanhte RCSS hte asuya dap ni hpyen masa rau ganawn ai lam n nga ai nga mani Htai mung Chiang Mai kaw galaw ai EAO (NCA simsa lam sen htu ai hpung) chyawm tari zuphpawng hta Jinghpaw Shiga Dap KNG hpe tsun wa sai re.
 
Ya ten ‘Wa’ mung UWSA Pang Sang ginjaw hta KIO mung shanglawm ai NCA lekmat n htu ai Miwa ga jarit jung amyusha rawt malan hpung 7 mung mani March 26 kaw nna zuphpawng galaw nga ma ai re.