burma-army-soldiers-in northern shan state

Ndai March 18 hta Myen dapnu 66 kaw nna rim woi mat wa ai, Lahta Sam mung, Kutkai makau Manje buga na mare masha marai 35 gaw Bukda hpungkyi jawng e masum ya tup san jep zingri hkrum ai hpang bai lawt wa sai re.

 
Shanhte hpe rim jep ai lam gaw mare kata nga ai “tu-pung (gumlau)” ni a mying chye mayu ai majaw re lam Manje mare masha langai KNG Jinghpaw Shiga Dap de tsun ai.
 
Myen nit sun ai “tu-pung” ngu ai gaw Wunpawng Mungdan Shanglawt Hpyendap (KIA) hpe tsun ai lam re.
 
Hpungkyi jawng e masum ya tup rim jep ai hta, shana rai yang tinang a labu palawng hte tinang hpe bai gyit hkang da ai re lam, Manje mare masha langai tsun ai.
 
Mare uphkang salang ni hte mare salang myit su ni gaw Myen hpyen ni hpe mare kata “gumlau (ta-pung)” n nga sai ngu sen htu ai hte dat dat ya ai lam rai nga ai.
 
Raitim, dai marai 35 hpe gaw shi ya laman tinang a yi, hkau na, bungli dabang de ‘n mai pru hkawm lu na’ ngu nna Myen hpyen ni matsun da ai lam, lahta na mare masha tsun ai.
 
Bai nna Manje hpung up sara a nta hte kaga mare masha ni a nta masum mali hpe mung shang gasawk tam nhtawm nta kata shinggan yawng hpe sumla gayet la mat wa ai lam mung chye lu ai.
 
Lahta Sam mung e February 26 KIA dapba 6 tara shang hpaw jat ai hpang, dai hpe ja ja n hkap la ai Myen asuya gaw hpyen n-gun 3,000 jan dai ginra de shalun tawn sai re. Ya ten KIA Dapba 6 hte gasat poi kaba byin ai lam n nga ai sha buga masha Jinghpaw ni hpe n tara rim jep zingri ai lam ni galaw nga ai re.