Nsang Awng La hte Mohamed Ali

‘Myen Mung Pu Noi’ nga nna mying gumhkawng ai Jinghpaw hkyen share ninghkrin Nsang Awng La gaw mungdan gawng malai hku nna, Egypt hkyen share ninghkrin Mohamed Ali hte March 18, hpawt ni Yangon Tu-wana ginsup wang e shana de hkying 6 hta htwi hkat na re.


Shawng de htwi hkat dang ai shaloi, tinang amyusha dawng hkawn sharawt wa sai Nsang Awng La gaw MMA (Mixed Martial Art) hkyen hpan hkum ginsup ninghkrin rai nna, shi hte htwi hkat na Mohamed Ali gaw Wushu Champion ninghkrin, rai nga ai.

Ya ten du hkra htwi hkat poi labau hta, Awng La gaw 16 lang dang, 9 lang sum hte Mohamed Ali chyawm gaw 10 lang dang, 7 lang sum re.

Ndai poi gaw Awng La a matu shawng n’nan lang kanu Myen mung e shingjawng ai rai nna, shi nan mung “ndai poi gaw ahkyak ai. Tinang mungdan kata htwi hkat ai hpe lak lak lai lai hkam sha ai” nga tsun wa ai re.

Asak 31 ning Awng La a dai daw buga gaw Jinghpaw mung Myitkyina, Du Mare rai nna 2014 Amerikan Andrews Dakkasu kaw hkailu hkaisha jawng lung nga ten MMA hkyen ginsup hpang wa ai re.

Shi a chyinghkai kawa Slg. Nsang Tu Awng gaw Jinghpaw Wunpawng Amyu Sharawt Hpung (PKDS) a ningbaw langai mung rai nga ai.

Awng La a MMA bandung gaw ‘One Championship’ hta awngdang ai hpang tinang dai daw buga e bai hkyen sharin jawng hpaw na matu masing re lam shi a website hta ka da ai re.

Bai nna 2012 October 13 Jason Louck hpe htwi badang dip la ai ten, Awng La gaw Jinghpaw mung hpyen yen tsin yam masha ni a matu shi lu ai shingjawng kumhpa gumhpraw nkau hpe garum lai wa sai re.