N tara Miwa nga hkwi li hpe Argentina gap lup

Argentina Navy ni gap da ai Miwa nga hkwi sang hpaw

Tinang hka panglai kata n tara nga shang hkwi ai Miwa sanghpaw li hpe gap lup kau ai lam, mani bat Lahkawng Ya shani Argentina tsun shapraw dat ai.

Miwa asuya hku nna grai myit tsang ai lam Argentina hpe tsun nna mabyin teng jep sagawn ya na lajin tawn sai.

Hka dap hku nna ndai Miwa sanghpaw li hpe bat Langai Ya shani Puerto Madryn panglai hkin gau, Buenos Aires mare daju a dingda maga deng 907 hta nga nga ai re lam, tsun tawn ai.

Hka dap ndau e ndai Miwa sanghpaw li hpe sinat sadi jaw gap tim, lale nna tinang hka dap sanghpaw maga de dinghkyen gawt sa wa ai majaw, sanghpaw kan shara shagu gap baw ai hpang lup mat ai re, nga ai.

Sanghpaw lup mat ai hta masha mali--- sanghpaw gawt captain hte ngam ai masum hpe hkye la nna ahkyak la rim tawn ai lam, ndau hta tsun ai.

Lai wa sai 15 ning e mung ndai zawn n tara nga shang hkwi ai maigan sanghpaw li langai hpe gap lup kau yu sai lam, hka dap tsun ai.

Beijing e Miwa Mung Maigan Matut Mahkai Hkringmang Dap, ga shaga ahkang lu Slg. Lu Kang shapraw ai ndau hta, Argentina hka hta nga shang hkwi ai ni sanghpaw li gap baw n hkrum shi yang shanhte hkying hkum chyawmra mi hkan shachyut hkrum ai, nga tsun ai. Marai 4 hpe rim mat wa nna kaga 28 hpe makau na kaga Miwa sanghpaw langai sa hkye ai lam, shi tsun ai.

Raitim dai ndau e hpa majaw nga lagu hkwi ai lam hte hpa majaw Argentina hka dap sanghpaw de dinghkyen shanang sa ai lam, n sanglang tawn ai.

Dingda Amerika, Argentina mungdan hte seng ai Miwa Sumsan Salang Rung gaw, “Argentina hpe manghkang mabyin hkyak hkyak sanglang dan na lajin tawn sai hta--- grai myit tsang ai lam, mabyin yawng lawan sawk shapraw nna Miwa asuya de shiga jaw na lam, rim hkrum ai ni a shimlam hte ahkaw ahkang ni hpe makawp maga ya na matu hte htawm de ndai zawn mabyin koi yen na lam” ndau hta tsun ai.