‘Mung Shawa Asuya’ kaw nna Hpakan Lungseng Maw pat hkum


Hpakan Lungseng Maw hpe tinang hkum nan ‘Jinghpawng Wunpawng Mungdan Mungshawa Asuya’ mying ai wuhpung kaw nna January praw 5, bat Lahkawng Ya hta pat hkum sai lam ndau dat ai re.

Ndai wuhpung hpe woi awn ai masha kadai re n chye lu ai zawn, wuhpung galoi hpaw ai hpe tara shang ndau shabra ai lam n nga shi ai re. Shanhte hte matut mahkai hkringdat hpe email This email address is being protected from spambots. You need JavaScript enabled to view it.  sha jaw da ai.

Ndau shabra laika hta lawm ai ginlam 1 kawn 8 hta ginra buga masha hte mungdan ting ninghkap tsun garu nga ai Uru Seng Maw Ga hta company ni lungseng laja lana htu sha bang nga ai lam htawng madun nhtawm, de a majaw pat hkum ai re lam ka da ai.

“Mung masha ni akyu n hkam sha ai hta n ga tinang lungseng maw hpe tara n shang ai maigan masha ni htu sha nga ai rai nna matut galaw nga yang gaw chyurum ni ngwi pyaw wa ai shaloi ja lung seng htu shaw la na ma mat nna, zai bru jang hte bum krin bum, pa chyakrin ni hpe sha mu mada mat sana” nga ndau hta tsun da ai.

Hpakan Lungseng Maw hpe “tara shang pat sai” lam ndai laika hta ndau sai hte maren, shiga na lu ai hpang tara n shang naw lagu htu shaw sha nga ai kadai hpe raitim “ ja ja ahkyak la” mat wa na lam mung sadi jaw tawn ai.

Ndau laika hta KIO dazik hte bung ai manau shadung mali ga-ang Jinghpaw Mungdaw hta nhtu chyikchyai re ai dazik hpe lang da ai. Dazik hte rau, “Jinghpaw Wunpawng Mungdan Mung Shawa Asuya”, “Jinghpaw Wunpawng Mungdan Mung Shawa Hpyen Dap”, “Jinghpaw Wunpawng Gumrawng Gumtsa Mungdan” nga ka da ai.

Bai nna, nhtoi hpe shut ai hku nna laika baw daw hta ‘2016 ning January (5) ya’ nga ka da n htawm, n pu jahtum de ‘2015/01/05’ hku ka da ai hpe mu lu ai. Raitim nhtoi shut ai hpe hpang e sharai da ai hpe facebook hta mu lu ai re.

Laika kanan garan jaw ai lam hpe Wunpawng Mungdan Shanglawt Hpung (KIO), Amyusha Democracy Ginjaw Pati (N.L.D), Amyusha Hpyenmasa Mungmasa Daphpawm (UNFC), Mungkan Wunpawng Hpung (UN) hte rung mazing nga nna ka da ai.

Ya na Myen asuya asak htum nna NLD asuya galai na mahka, Hpakan lungseng laja lana htu sha ai lam hpe Myen asuya hte KIO n pat hkum ai ten kadai re hkrak n chye ai Jinghpaw Wunpawng Mungdan Mung Shawa Asuya kaw nna pat hkum wa ai re.