KIO/KIA 50 Ning Hpring Hta, Hpa Rai Manau Nau Na Law?

KIO/KIA Ningbaw Ningla Ni Hpang De,

Hkakaburazi a kraw madai nsen hpe hpaw madun dat ai.
Jan. 31 shani na RFA Jinghpaw Nsen hpe madat hkrup nna, Wunpawng Mungdan Shanglawt Hpung (KIO/KIA) gaw du wa na Feb 5 hta ang ai 50 ning Rawt Malan Nhtoi hpe Mai Ja Yang e “Sinpraw Wundan Manau Poi” hte rau galaw na lam lawm pru wa ai majaw, grai mau let, myit n pyaw nga  n’ngai.

kia_50_wundan_manau

Hpa rai, ndai daram sadi maja, hkyen lajang ra ai aten hta, Manau nau na da i? Anhte a poi shagu, ladu lanan du shagu, Manau nau nna poi galaw ai, pyaw manawt nna poi galaw ai gaw, shut nga mali ai. Dai ni na zawn, mabyin masa lam ni chyat magang wa nga ai sat lawat kata, aten maka hta, hpa rai Manau nau na? Hpa rai ka manawt na? Ningre ai lam ni a majaw, “Wunpawng Sha ni Pyaw Gumlawt na ten Du Sani?” ngu ai sumrai hpe lai wa sai kade nna ai aten hta Kachinnews kaw ningmu mara dat sai rai li ai. Dik shale, Manau n nau yang, poi n byin na re, nga jang mung, Manau gaw, anhte a yawn madai ai nsen, anhte amyu sha ni a awmdawm hpe marit ai nsen hpe shapraw ai hku nau ra na ga ai. Anhte a “lamentation” hpe shapraw ai nsen hku, nau ra na ga ai. Korea ni a 'Mijung Theology' hta, ‘mask dance’ ngu ai hpe shanhte a “n hkam sharang lu ai tsin-yam hpe shapraw ai hku” mung ka manawt lang ma ai lam mu lu ai. Dai ni anhte amyu ni, ndai daw de, hpa galaw tim, Manau nau, na sha myit dum ai zawn rai wa nga ga ai. Aten masa sat lawat maka hta hkan nna, galaw sa wa ra na ga ai. Wunpawng sha ni gaw, pyaw na ten n du shi ai. Hpa rai  pyaw gumlawt, ka manawt, chyaru tsa lu, kyang lailen jahten, gumhpraw arang shama..na ga ta? Anhte amu madung gaw hpa rai nga mali ga ta? Dai ni anhte a ningmu hpe hkrang shapraw woi sa wa ai hta, law law a matu hkap la mai ai masa hpe lata lu na grai ahkyak nga mali ai. Ga shadawn hku mabyin nkau mi hpe yu ga.

Shanglawt ningbaw ningla ni hpa rai, amyu sha law law e kam hpa n lu ai zawn rai lai wa saga ta? Gap hkat jahkring ngut ai shingjawng shinglaw rai, myu ga de wutdek nta gap, mawdaw kaja mari jawn, lamu ga dinghput htingra n sharam ai mari mahkawng shaja, re ai gaw, shanglawt ningbaw ningla ni, lahta tsang magam gun ni, hte dai ni hte ni kahtep ai masha ni, jinghku jing-yu ni rai nga ai le. Hpun maling hkan, ja maw ni hkan mung, Shanglawt lahta tsang masha ni sha, ahkaw ahkang garan sha lawm lu nna, kaji kajaw re ai ni gaw, grau grau matsan panglai de hkrat shang wa ai lam ni byin lai wa sai  le. Dai majaw, “ndai ni gaw teng sha wa, amyu mungdan hpe tsawra ai ni re i?” ngu ai ga san gaw amyu sha ni law law a kraw hta ung ang shagun lai wa sai hpe ningdang shara n nga ai. Dai majaw, shanglawt salang ni gaw, “privileged people” ahkaw ahkang a madu ni zawn, amyu sha ni a man e byin lai wa sai. Dai ni mung, Myen a BGF  hpe ningdang nna, ya na zawn baw ja nga ai majaw, shanglawt hpe n-gun jaw ai ni mung law law bai nga wa sai. Raitim, matut manoi myit dum na lam gaw, anhte bandung hpe, ndai lam langai hte sha sa nna du lu na n re, hpe mung dum let, “myi sha latsa shatut, zai ladat ninggawn shaprut” let, amyu sha ni a shawng lam gam maka hpe gawgap sa wa ra mali ai. Ndai lam hte seng nna, shawng lang na nye a “Wunpawng Sha ni Pyaw Gumlawt na Ten Du Sani?” ngu ai laika a jahtum daw de ka bang da n’ngai. Bai tam hti lu nga ai.

Nye a ningmu hku gaw, Rawt Malan Poi hpe pyaw ai Manau poi hte n-galaw shangun mayu ai. Dai poi hta, sa lawm ai ni yawng a myit masin hta, roi rip dip up, sai chyup hkrum ai prat hpe myit n dik ai, ka-un ai, myit masin ni jasu ya ai poi hku mahtang rai ra nga ai. “Rawt malan” ngu ai ga nan pyaw ai poi n rai nga ai. Rawt nna malan ai, anhte a tsin-yam amyu myu: oppression, infliction, injustice, exploitation, suffering” amyu hpe myit n dik n kam hkam nna, dai zawn byin shangun ai rudi “root” hpe gumlang shakut ai “struggle” hpe matut ninggun ban ai poi she rai  nga mali ai. Dai majaw, mai byin ai rai yang, ndai lam hpe lit nga ai salang ni sung sung myit yu ya na lajin n’ngai.

Ngai, amyu hte mungdan hpe tsawra myit kap, n-gaw n ja nga n’ngai. Raitim, amyu mungdan a matu ngai hpa garai n-galaw lu shi n ngai. Sinat laknak hpai nna Shanglawt dap de n shang tim, “bawnu marai shapraw, zai ladat ningnan shaw, myit masa ningmu lam waw” ai shara hta gaw, shang lawm gunhpai lu na shakut nga n’ngai. Maigan mungdan e, simsa ai shara ni nga ai. Raitim, anhte a dinghput htingra, sun hkauna, lamu ga, namsi namsaw ni hpe myit mangoi, n ja n hpra, sindun nga n’ngai.

Rawt malan poi kaw, Manau n nau ai majaw, akyu n yawm na re. Manau nau ai majaw, mahtang anhte akyu yawm na re. Wunpawng sha ni gaw, poi galaw, n dum n dam ka manawt, pyaw gumlawt na ten garai n du nga mali ai.. Chyeju hte Manau n nau saga law! Yawn madai n-sen mahtang shapraw ga law..