Amyusha a matu tengman ai majan

Mungkan hta aten gaw manu dan dik ai nga, hpaji ninghkrin ni tsun ai hte, anhte shinggyin masha ni yawng hkam la nga ga ai tim, ahkaw ahkang kata ai, dip lu dip sha hkrum nga ai, tara n lang ai up gamyet sha hkrum nga ai, sharen da hkrum ai, shinggyim ahkaw ahkang ginlut hkrum nga ai, shinggyim uhpung uhpawng langai ngai, masha langai ngai a matu gaw aten ngu ai hpa manu n dan ai hte hpa akyu n nga nga ai.

Tinang a htingbut htingra tinang a lamu ga tinang a ga htunghking makam masham, tinang hte tinang myu hta htap htuk ai hku wanglu wanglang tsun shaga galaw lu yang she ten gaw manu dan ai hte akyu rawng na re.
051609-kia
Ga n hkrum htunghking n bung ngasat ngasa malu masha n bung ai ni she anhte lamu ga hta up gamyet sha nga yang galoi rawt jat galu kaba wa lu na n re. Kaning re chyasam Myen ningbaw wa up hkang wa wa anhte myusha ni matu grau nna galaw jat ya lu na lam n nga ai, Awng San Su Chyi mung shi hkrai sha mai galaw ai n re, uhpung uhpawng hte galaw ra na sha re majaw anhte myusha ni matu hpa nau myit mada  shara n nga ai.

Tinang myusha gam maka hpe tinang nan daw dan hparan la ra sai gaw yawng chye nga sai hte maren, magrau grang ai share shagan ai sari rawng ai sai kaba ai myusha re majaw langai sha ngam tim Myen hpe gaw gasat nan gasat ra ai hte laknak hte myusha a mahtai hpe tam ra saga ai. Kaga myu bawsang hte anhte n bung ai, gumrawng gumtsa mungdan lu hkra annau ni labau jaw ai lit hpe n mai hprai sai.

Si du gaw galoi mung du wa chyalu re tengman ai majan hta jaw ai myusha lamyan hta tsap ga. Dai ning na Mungdaw Nhtoi hpe mung yawng chyawm ninghkap ga, anhte myusha ni a labau shang ninghtoi kaba ni hta Myen woi awn lam yawng hpe ninghkap ga. Tsaw ra ai, tai hpyen a shingnan tai ya nga ai hpu nau ni e, tinang kasha tinang myu hpe sat hkat shangun ai myusha shada sai hka lwi shangun ai hpawng hta n lawm ga, lau lau myit malai wa rit, kanu myusha hpang de ten naw lu yang lau bai wa rit. Poi ginra de kadai n sa ga. Tengman ai majan awng dang na matu hpa mung galaw ra sai.