DKBA majan ntsa, ga san san hpa KIO/KIA-Daphpawm

De KIO/KIA hte Daphpawm,

Lai mat wa sai Nov. praw hta amyu bawsang laknak lang rawtmalan uhpung ni Daphpawm gawgap sa wa na myit hkrum dawdan masai.

Daphpawm galaw sa wa ai labau hpe yu yu yang, KIO/KIA ningbaw kaba Maran Brang Seng a prat hta NDF hku nna shawng galaw lai wa yu sai. Daphpawm ni jawm gasat shara la nna Munghpawm Asuya (Federal Asuya) ndau ai n na yu ai. KIO/KIA ni gap hkat jahkring nna Myen hte simsa lam la mat wa ai majaw, NDF kaw nna shale kau hkrum sai.

De hpang 2001 ning hpang de Doi Htaleng kaw KIO/KIA kaw nna myit hkrum ai hte M.A (Military Alliance) ngu ai hta training ni jawm la nna galaw lai wa sai. Sat lawat amyu myu a majaw, dum dum hte hte hte bungli n byin mat ai hpe na ga ai.
kio-ningbaw-malai-nban-la
De hpang lai wa sai shaning hta Federal Army hku myit hkrum nna hpaw na matu shim ai hku hpang nga sai lam na lu ai. Daini Du Kaba Nban La shinggan de le hkawm wa ai hpang BGF hpe n hkap la ai lam galaw sai. N galaw yang n byin na re ngu myit jasat hte May 2010 hkan kaw nna Federal Hpyendap hpaw na matu amyu bawsang laknak lang uhpung ni hpe jawm mahkawng nna jawm bawngban galaw sa wa ai hta, Nov. praw hta bungli jawm galaw na myit hkrum lam lu la ai kaw du hkra rai sai.

Dai hta hka, mani daini DKBA hte Myen hpyendap ni mahti hkat wa masai. KNU gaw tinang amyu langai sha re majaw hpyenma, arung arai hte garum nna hpyen man de shang nga masai. Dai wa, ya hte myit hkrum lam la da ai SSA-N hte KIA hpyenla ni ganang rai nga ma ta? DKBA a shawnglam majan hta garum na offer (n lu shadu na mi raitim) sha pi gaw jaw masai kun? Hpyendap n-gun hte n lu garum yang, logistic (ra ai arung arai) hte gaw garum na lam ni nga masai kun? Ya hte myit hkrum nna dawdan hpaw da ai Daphpawm hpe test (chyam ai) galaw ai lam rai nga ai.

Ndai laman sha myit hkrum lam la da nna hpaw hpang da ai Daphpawm gaw majoi aten shama gamung dup, scholar (hpaji ninghkrin) hte funders (alu garum ai ni) ni, analysis (sawk jep nna) galaw nna paper ka, funding gumhpraw tam jat shara a matu sha on paper (maisau) kaw nga ai Daphpawm n rai yang kaja na re ngu mu mada ai. Kaja wa lata tut de shada jawm galaw sa wa lu ai, Federal Union a lahkam de woi galaw sa wa lu ai uhpung rai wa u ga, madi shadaw let myit mada kam ai.