Myen Dap gaw Miwa Mungchying Masha (Jinghpaw) Langai Hpe Gap Sat

.

Myen Hpyen Dap (321) Ni Miwa Mungchying Masha (Wunpawng Sha) Langai Hpe Gap Sat

Gap sat hkrum ai wa a mying:  Slg. Lahpai Zau Lawn

Asak:  (53) ning

Byin ai ninghtoi:  12rd Jannuary 2012 ning (bat hpang 4 ) ya shana

Hkying:  11:00 pm daram

Byin Ai Shara:  Loi Lung mare, Loi Leng Ninghtawn, Lung Chuan Ginwang
                           Miwa Gumsan   Mungdan

Galaw tawt lai ai wa (perpetrator):  Myen Asuya Hpyen Dap, Dingdung Daw Daju (M.P.Hk) npu Waimaw ginwang, Shwi Nyawng Pyin-daju Hk.M.Y Masat (321) a npu na shawng lam hpyendap rai nga ai (Mu Bum Post)
lahpai-zau-lawn-loilung
Mabyin kadun

12/1/2012 ya shana Myen Mung hkying, hkying 11:00 pm daram hta Miwa Gum San Mungdan, Lung Chuan Ginwang, Loi Leng Ninghtawn, Loi Lung Mare na Slg. Lahpai Zau Lawn, Asak (53) ning gaw Loi Lung mare shingnawm na shi a Saw Kaw sun kaw nna dum nta de yu wa ai hkrun lam hta Myen Asuya Hpyen Dap, Dap (321) a n pu na shawng lam hpyen dap rai nga ai (Mu Bum Post ) na Myen Hpyen La ni gaw Miwa mung jarik hpe lai shang nna Miwa mung hkran kata Loi Lung mare hte Myen Mung Jarik lapran na nam kata kaw shi hpe gap sat tawn ai lam byin lai wa sai.

Slg. Lahpai Zau Lawn hpe kan hku wam kaw (4) lang gap bang ya, baw pung kum maga de shara 2 gap bang ya nhtawm, myi man kaw mung sinat nhku hte adit abyen ya ai.  Shi a moi mang hpe mung gap hkra ai shara kaw na hpa lung mi daram tsan ai kaw lam dung npu maga de garawt gabai tawn da ai hpe sa mu la ai. Mang nga ai de sa wa na lam kaw hkam bawm (1), shi hpe gap hkra ai shara kaw Myen Hpyen La ni a soita baw chyawp langai taw taw ai, dai baw chyawp makau kaw (1) hkam da ai hpe myi chyaw sa mu ai ni tsun dan ai. Ya du hkra dai hkam bawn lahkawng hpe Miwa Asuya kawn n shaw kau shi ai lam chye lu ai.

Slg. Lahpai Zau Lawn a moi mang hpe gaw 14/1/2012 ya shani Loi Lung mare masha ni sa mu tam la nna Miwa Asuya seng ang ai de ap ai lam galaw sai. Miwa Asuya seng ang ai kaw na mung jep chyoi yu nna nat kau mai sai ngu ahkang jaw ai hte dai shana de hkying 4:00 daram hta nat makoi mayang kau sai lam chye lu ai.zau-lawn-id
Mu Bum Hpyen Dap na Myen Hpyen Hpung ni gaw ra ai malu masha ni hpe Miwa hkran jarik kata hku nna shalet sha nga ai re. 12/1/2012 shana mung Myen Asuya Hpyen La ni gaw lu sha shalet la na matu Miwa hkran de rap nna sa lagyim nga ai kaw Slg. Lahpai Zau Lawn mung sun kaw na wa ai hte hkrum nna gap kau ai masa re lam hpe chye la lu ai. Loi Lung mare gaw Myen mung jarik hte deng (4) daram tsan ai kaw nga ai re.  Slg. Lahpai Zau Lawn hpe gap sat ai shara gaw jarik hte yep di nna dap jung da ai Mu Bum Myen Hpyen dap hte deng (3) daram tsan ai.

Lai wa sai 1992 ning hta KIA Dap Ba (3) hpe Myen Asuya Hpyen Dap ni htim gasat nna Mu Bum hpe zing la kau nhtawm Mu Bum kaw Myen Hpyen Dap ni shara jahkrat dung mat ai hpang jang mung, Loi Lung mare na Slg. Maru Lagyung ngu ai wa Myen mung jarik makau, Miwa hkran maga nga rem sa ai kaw Myen Hpyen Dap ni hkam da ai bawm hta hkala la nna, mang pyi n mu mat hkra lagu sat makoi kau ya ai lam mung byin lai wa ga sai lam hpe buga masha ni kaw na chye la lu ai.

Ndai Mu Bum Hpyen Dap kaw gaw lai wa sai 2011 ning October shata (28) ya shani mung, Myen Mung hkran Mu Bum lagaw, Hkai Bang mare na Hpawmi Sumlut Roi Ja hpe shi a kagu yan madu wa hte rau yi kaw na rim mat wa ai hta, kagu hte madu wa gaw hprawng mat wa lu nna Sum Lut Roi Ja hpe gaw Myen Hpyen la ni e woi mat wa ai gaw dai ni du hkra mat mat sai re. Mu Bum Hpyen Dap kata kaw Sumlut Roi Ja du wa ai kaw na num marai (4) ayan nga ai rai yang October(31) ya hpang kaw nna gaw shi hpe dai dap kata n mu mat sai majaw sat kau sai ngu na maram lu ai.  Ya Mu Bum Hpyen Dap kata naw woi hkawm nga ai num (3) gaw Balawng amyu sha num ni re lam hpe hpyen dap htep kaw na sa mayun yu nna Balawng ga ga hkawm ai hpe nan na la ai buga masha ni kaw na chye la lu ai.

2011 ning December shata (22) ya shani hta, Mu Bum Hpyen Dap na Myen Asuya Hpyen La (2) gaw lata bawm langai hpra mung, lu sha gun na htingka mung gun rai nna Loi Lung Mare na kum shu sun kaw gawp nga ai hpe mare masha ni wa mu nna jawm rim nhtawm Miwa Asuya de ap ya sai lam hpe mung chye lu ai.