KIO hte J.W A Shawnglam Lamik Kumla

myen-pala-hkra-chyum-laika
October 16, 2011 aten 12:18 p.m. hta byin ai, Jinghpaw Mungdaw, Manmaw Ginwang majan pa langai mi hta myutsaw share shagan ni hte Myen hpyen ni a gasat gala gap hkat ai kaw Hpungup Sara langai mi a Chyum Laika hpe Myen hpyen na sinat pala langai wa hkra ai gaw pala dai gaw Chyum Laika a kaang kata de du shang nna Chyum Laika a 50% daram hten mat nga ai.  Dai Chyum Laika kaw shang mat wa ai pala gaw Shakawn Kungdawn Laika Daw kaba 37 kaw wa hkring mat ai hpe mu lu nga ai.  

Dai Shakawn Kungdawn Daw kaba 37 hpe Hpungup Sara hku nna bai hti yu yang Wunpawng mungdan hte anhte Wunpawng sha ni hpe Karai Kasang bau sin nga ai hte Shawnglam a matu Karai Kasang lajang da sai lam hpe asan sha chye na hkam sha lu ai majaw Hpungup Sara wa gaw chyeju shakawn ai hte Manmaw Ginwang Rung de dai Chyum Laika hpe la sa nna Ginwang Sara ni hte hpung masha yawng hpe n-gun jaw madun dan sai lam chye na lu ai.  

Ndai shiga hpe mu la chye la sai Chyurum Wunpawng sha ni yawng mung Karai Kasang gaw anhte Myu sha ni hpe bau sin nga ai lam hpe myit dum chyeju shakawn let Karai Kasang anhte hpe tsun shaga dat ai Shakawn kungdawn laika Daw kaba 37 hpe chyeju shakawn n-gun la jawm hti ga law...