KIO a Machyoi Hpung Rapdaw ntsa Jinghpaw wuhpung wuhpawng ni a ningmu hte myit mada lam

Myitkyina-KIO-technical-advisory-team-office
Asuya hte Wunpawng Mungdan Shanglawt Hpung (KIO) lapran hpyen masa shaja hkat nga ai hpe lahkawng maga shayawm lu na matu hte ngang grin ai simsa lam maga de lawan ladan hkrang shapraw lu na matu Jinghpaw mungshawa wuhpung wuhpawng ni shanglawm ai simsa lam hkrang shapraw hpung ‘Machyoi Hpung Rapdaw’ Technical Advisory Team hpe July 23 ya shani tara shang hpaw dat sai rai nga ai.

Dai Technical Advisory Team a ntsa Jinghpaw wuhpung wuhpawng ni a ningmu gara hku nga ai kun? Jinghpaw Mungdaw simsa lam hkrang shapraw na lam hta shanglawm shamu shamawt nga ai Jinghpaw wuhpung wuhpawng hpung (3) hte shanhte a ningmu hkamla lam ni hpe KNG Jinghpaw Shiga Dap kawn matut mahkai san sagawn da ai.

1. Simsa lam lamyan hta ndai zawn Technical Advisory Team gaw kaja nan ahkyak ai ngu mu mada ai i? Hpa na kun?
Jinghpaw simsa lam zinghkri hpung (Kachin Peace Network) kawn Coordinator Jan. Hkawn Ja gaw,- “ahkyak ai hku na tsun ga nga yang grai ahkyak ai lawnglam kaw lawm ai. Kaja wa nga yang bawngban jahkrup ai ngu ai gaw lani lahkawng ni ram sha na ai le i. Teng sha saboi ntsa bawngban ai ten hkan e mung anhte Myen mung a mungmasa manghkang hpe yu dat yang shaning (60) ning n ga sai. Dai hku nga yang shaning (60) ning daram majan byin ai lam hpe saboi ntsa kaw langai lahkawng ya sha jahta nna dawdan ai rai yang hkut hkut nai nai bawngban lu ai madang de du lu na n re. Dai majaw ndai hku Technical Team hpe hpaw dat ai a marang mungshawa ni tatut hta hpa byin taw ai htawm hpang hpa bai byin wa na ngu ai masa hpe asan sha shawk sagawn sawn maram nhtawm hpaji jaw ai lam ni dat kasa ni hpe sanglang dan ai hku na shaning (60) jan na manghkang yawng a nam chyim hpe bawngban yang she mai kaja ai hku na hpaji jaw lu na re ngu shadu ai. Dai zawn re ai ladat hte sha n rai yang saboi ntsa kaw shaning (60) na hkra gasat mat wa sai manghkang hpe hkyinghkum (60) snr hkyinghkum (100) daram hte sha bawngban dawdan na nga yang anhte grai mala hka ai daw ni nga wa na re.

Kaja nan ndai hpung gaw Simsa lam hpe madi shadaw ya lu na ngu shadu ai i?
“Technical Team rung hpaw shabaw ai yaw shada lam hta lam (2) gaw; mungshawa ni gara hpe hkrak ra ai ngu ai hpe sawk sagawn maram nna dai nsen hpe shanglawm lu hkra ahkang jaw na matu, dai hpang mungshawa nan dan tawk shanglawm lu hkra ngu nna Team hpe hpaw shabawn sa wa ai re. Yaw shada lam hta mungshawa lawm hkra nga nna dai hku n-gup hte sha lawm mu!, Lawm mu! ngu tsun ai n re sha kaja nan gara aten hta gara lam hku shanglawm na ngu ai Frame hpe jaw da ya ai majaw kaja nan tatut lam a mahtai (Process) re ngu hkap la ai le.”

Technical Advisory Team hpaw wa lu ai hpe kaja ai ngu na mu mada ai i.
“May shata 29-30 ya shani hkrum shaga bawngban da ai myit hkrum malu lawnglam (7) kaw na nambat (6) hpe shatup ai re majaw ndai myit hkrum lam hpe hkrang shapraw ai ngu gaw simsa lam bawngban hpawng kaw na mahtai hpe hkrang shapraw ai re majaw le, simsa lam maga de grau shanawng wa ai ngu hkawnhkrang lu ai. Hkap la ai. Langai gaw Technical Team hpe hpaw shabawn dat ai masing gaw ndai KIO bawngban jahkrup hpung dat kasa ni a matu tau hkrau hkyen lajang lu na re majaw lama na simsa lam saboi hta dan tawk n lu tsun ai lam ni hpe tau hkrau hparan jasan la lu na re majaw le i, bawngban hpawng ni grau lawan ladan rai wa na re ngu shadu ai le. Magyep kap htap htuk manu wa na re ngu mung shadu ai.”

Technical Advisory Team a masing gaw hpa rai kun? Gara hku shanglawm lu na re ngu shadu ai?

“Ya na zawn Technical Team rung hpaw shabawn dat ai majaw jut shara shagu n ngam hkra, mungshawa ni a nsen n ngam hkra le i. Yawng hpe gumhpawn tang madun lu na re majaw bawngban hpawng ni grau nna lachyum nga wa sana re. Bai nna lawan ladan re loi shangun na re ngu shadu ai. Technical Team hpe hkrai sha kabai da na n re.. Ndai Technical Team kalang bai madi shadaw garum la lu hkra Jinghpaw mungshawa maga na wuhpung wuhpawng ni hku na jawm hpawm nna arau myit hkrum myit ra ai hte machyoi hpaji ladat hku na hpaji jaw ya lu ai Thematic Group hpe bai kahtap hpaw sa wa na re. Dai hpung gaw bawngban na ga baw hta hkan nna laksan re ai hpaji ninghkring ni paw pru lu na matu Civil Society kaw shanglawm ai hpa awn salang ni hku na kalang bai sawn maram yu nna garum mat na rai nga ai. E, ya na zawn re hpung ni garum la ai marang Technical Team gaw grau nna n-gun nga wa na rai nga ai. Lama na ndai Thematic Group kaw pyi ra rawng ai hpaji lam ni, zai ladat ni kungkyang ai lam n nga sai nga yang she anhte ndai Technical Team a matu shinggan hkan na hpaji chye ai ni hpe saw nna htawk la ra re. Dai hku rai yang she mungshawa a nsen mung lawm wa na. Mungshawa tsang nga ai nsen mung lawm lu na, machyoi hpaji hku na mung ladat jaw jaw tek jum lu wa na rai nga ai. Dai majaw anhte teng sha lu la na matu shakut nga ai ndai simsa lam lamyan wa mung ten galu ngang grin nna dinggrin dingnawng re ai simsa lam hpan byin wa na re ngu myit mada ai. Bai nna mabyin masa lam mahkra hta malap mali re n nga ai sha hkum hkum zup zup galaw gun hpai lu na re ngu shadu ai le.”
 
2. Technical Advisory Team a magam bungli gaw lahkawng maga na manghkang hpe hparan ya na machyoi hpung re ngu shadu ai kun?
Simsa lam akyu galaw hpung kawn Slg. N-shang San Awng gaw;- “Hpang e asuya hte simsa lamyan ni galaw ai ten hta mungmasha bawngban lamang ni, hpyen masa hte seng ai ni buga gaw sharawt galaw nga ai ten lapran kaw tau hkrau shajin lu na matu Technical Team hpe hpaw shabawn na myit mada da ai. Bai nna asuya maga na mung Myanmar Peace Center (MPC) ngu nna Technical Team masa hku na hpaw shabawn da ai lam nga wa ai majaw ndai KIO dat kasa ni gaw (MPC) hte jahkrup ai n re sha KIO dat kasa hte asuya dat kasa ni bawngban jahkrup mat na rai nna KIO maga na Technical Team hte Myen asuya maga na Myanmar Peace Center ni zawn tau hkrau jahkrup ngut ai hpang bawngban hpawng langai galaw yang hkyen lajang ai lam ni galaw mat na matu ndai Technical Advisory Team hpe hpaw shabawn dat ai rai nga ai. Asuya MPC hte htawm hpang na bawngban hpawng a matu tau hkrau hkyen lajang taw ai mung kade n na yang galaw wa lu sana re ngu myit mada ai. Bai nna hpyen dap hpe seng ai lam hta ra wa yang dat kasa rung n hpaw lu shi ai majaw, dat kasa rung a malai ra rawng ai hpyen masa shayawm nna hpyen masa shamu shamawt lam n byin hkra mung garum lu na re. Hpang de mungmasa bawngban hpawng galaw wa ai shaloi ndai Technical Team gaw grai madi shadaw nna garum lu na re ngu mu mada ai.”

Hpa majaw ndai zawn re hpung ra taw ai ngu mu mada ai?
“Asuya hte simsa lam bawngban ai ten lahkawng maga na dat kasa ni kalang bawngban da ai malu hpe tatut hkrang shapraw ai hta lanyan nyan re hpe mu lu ai. Rai yang lawan ladan byin wa hkra ngu lapran kaw tara shang ai rung langai gaw myu ga e hpaw ra nga ai masa pru taw sai re majaw shanhte na Technical Team hpe myu ntsa tawn da ai hta myit hkrum da ai bungli ni hpe lawan ladan hkrang shapraw lu na hpe madi shadaw ya lu na re ngu myit mada nna hpaw dat ai re”

Ndai hpung kata kaw mungshawa ni shanglawm mai ai gaw gara shara zawn re ai kaw?
“Simsa lam lamyan hta myit lawm ai masha hpaji jaw mayu ai masha ni mung ya Technical Team rung hpaw ai ten mungshawa hte ganawn mazum lit la sa wa na lamyan alak ni hpaw san da ai. Dai majaw masha shagu ndai simsa lam hte seng nna shanglawm mai ai bawngban mai ai, hpaji jaw mai ai ngu ai hpe anhte na ai majaw masha hkum shagu mung ndai simsa lam hkrang shapraw bungli hta shanglawm wa ai hpe mu lu ai ngai ndai hpe tsun dan mayu ai.

3. Technical Advisory Team kata kaw mungshaw gara hku shanglawm ging ai ngu shadu ai.
Jinghpaw Wunpawng Bawngring Mahkri Shawn Hpung (KDNG) kawn amu madu Slg. Tsa Ji; “Ndai rung hpaw ai hta shara magup kawn shanglawm lu na ahkyak ai. Ganing re ai masha wutsang na wuhpung ni raitim, npu tsang madang kawn hpaji ninghkring madang du hkra ndai zawn yawng na ningmu ni grai ahkyak ai. Dai shanglawm ai wuhpung uphpawng mi rai rai, dinghkrai mi rai rai hpa ni hpaji jaw na kade daram kara hku Topic gara hku gabaw hte nchyan jaw na? Shi kaw nga ai lawnglam gaw hpa galaw na ngu ai hpe atsawm hkrak re ai lam ni hpe Topic gabaw ni hte hpaji jaw lu yang grai kaja na rai nga ai le i. Magup sumhpa lawm ai tinang a lawnglam ni hpe bawngban lu yang gaw grau nna hkrak ai hpung rai na re. Ndai hpung hpe hpaw shabawn dat ai a marang akyu ara gaw nga wa na re.”

Aung ang ai lam hta hpa ni mai byin ai kun?
“Ya gaw ndai Technical Team hpaw shabawn dat ai marang htawm hpang na mungmasa lam a matu kade ram akyu hkam sha na ngu ai gaw daw langai re dai gaw asuya hte KIO ntsa madung re. Madung hku na nta madu rai nga ai asuya maga le dai hpung hpaw shabawn ai hta hkan nna mungmasa grau kaja wa na, simsa lam hpe grau nna lu la shangun na ngu ai lam gaw hpang na daw langai re. Dai daw gaw madung nta madu rai nga ai asuya wa kade daram ahkyak la sadi sahka ya na kun? Jinghpaw mung na mungchying sha ni ndai zawn Technical Team shanglawm hpaji jaw ai lawnglam a ntsa shanhte kade daram ahkyak shatai ya na kun? ngu ai lawnglam a ntsa madung rai mat na.”