Hpa majaw Myen tai hte Gap Jahkring n mai ai?

 

 

ning hkap

Hpa majaw Myen tai hte ya ten “Gap jahkring, Simsa Lam” n mai galaw a ta?

“Simsa Lam Masu” hpe “Tengman Simsa Lam” jawm bawng ga nga nna Myen tai hpyen gaw hpaji daw let bawngban ga saw nga ma ai.


Anhte a Shanglawt Mungdan ningbaw ningla ni ndai kalang bai Myen tai a masu magaw, myit n san, myit magaw hte maw mawn ai lam hta n hkan hkrup na she ahkyak dik sai. Myen tai hpyen gaw ya ten hta Kayin, Sam, hte Aung San Kaw ni yawng hte hpyen man hpaw ra ai majaw shanhte lit tsang na matu sha "simsa lam" jahpai masu nga ma ai. Myen tai hpyen du ni gaw teng teng “Simsa Lam” hpe ra sharawng ai ni n rai, shanhte a aten ladaw hte masa kasup ai sha re hpe anhte a ningbaw ningla ni labau kaw nna mung, mahkrum madup kaw nna mung chye na hkawn hkrang nga na hpe kam ai.

Ya ten hta shanhte Myen hpyendap kata e mung shada da n ju n dawng hkat, shara kashun, arawng la mayu rai hkat nga ai hpe matut na nga ga ai. Shanhte a lam shanhte shawng hparan ngut ai hpang she anhte munghpawm mung masha ni hpe shamyit na matsing hpe matut galaw yang grau htap htuk na hpe shanhte chye nga ma ai. Bai nna anhte a buga na sut n hprang rai shaw sha ai “Gem Sale” ni kaw nna lai wa sai 3 lang rai yang Naypyidaw de $5.7 billion daram shang wa sai nga ai majaw "simsa lam" matut jahpai nna Wunpawng mungdan hpe nrut nra sha ngam hkra matut makret sha na she hkyen nga ma ai. Mungdan simsa yang she Myen tai a jinghku Miwa wa kaw nna gumhpraw ni lam amyu myu hku shang wa na lam shanhte matut galaw lu na re.

Wunpawng Mungdan Shanglawt Hpung gaw ndai kalang na majan hta anhte myu sha ni, ganoi yawng ngu na myit hkut, myit hkrum ai hte kasat hpang wa ai "tengman ai hte tara rap ra ai majan" hpe woi awn nga ai majaw matut nna shawng lam hta myit shaja let ngang ngang tsap na ahkyak dik nga ai. Wunpawng myu sha ni a matu mahtai kaja langai sha n pru yang gaw ndai majan gaw lachyum n pru ai  kasat gala, du daw sai hkaw lam sha rai mat na nhten.

Mung shawa a yak hkak jam jau ai lam ni gaw moi na mung yak ga ai, ya mung matut yak nga ga ai, raitim ndai majan gaw hpang na anhte a shawng lam hte anhte a kashu kasha ni n yak wa na matu, tengman simsa lam byin wa na matu hpaw ai majan re ngu mu mada hkam la ai.

Myen tai hpyen hte ya nan "simsa lam" la yang gaw, ya ten hta matut manoi kasat nga ai Kayin hpunau ni , Sam hpunau ni hte du wa na aten hta shada kam ai hte bai bungli jawm galaw na matu grai yak wa na re.

Jet ai "Simsa lam" de sa wa na n re ai majaw ya ten hta Myen tai hte "Simsa lam" la ai rai yang Myen tai hpyen a matu grau nna akyu pru ai lam she rai na re, Myen tai hpyen hpe karum ai lam she rai mat na re hpe sung sung jawm myit dawdan galaw sa wa ga.

Anhte mung masha ji nban a akyu hpyi ai lam, myit masin shabawn let n-gun jaw/la nga ai lam ni hpe mung shawng lam kaw nga ai hpyen du hpyen la ni hpe matut manoi chye na shangun mayu ga ai. Tengman ai “Simsa Lam” hte shanglawt ai nhtoi gaw kade nna ai ten hta anhte Jinghpaw Wunpawng mungdan hta ninghtoi gintawng langai zawn pru wa u ga lo!