Hpa majaw Manau Poi sara galaw mayu ai (ningmu)

Tinang a Mungdaw masat Nhtoi hpe Jinghpaw Wunpawng amyusha ni, amyusha ni a reng ai htunghking Manau nau nna, masat shagrau poi galaw ai lam hpe shaning shagu galaw nga ga ai.

Tinang a Mungdaw masat Nhtoi, bai nna, Manau nau ai lam mung tinang amyusha ni a htunghking rai nga ai majaw, kaji ai poi rai rai, kaba ai poi mi rai rai, tinang hte seng ai hpe tinang hta nga ai atsam hte, tinang nan madu tai lit la woi awn let wanglu wanglang shabyin shatai galaw lu ai lam gaw, kaja dik rai na re. Dai zawn galaw lu ai marang e, kabu myit pyaw lu na, chyeju dum ging ai ni hpe chye ju dum na, shakawn ging ai ni hpe shakawn na sha rai nga ga ai n rai ni?
kachin_manau_festival_myen
Raitim, 63 ning hpring Jinghpaw Mungdaw masat Nhtoi hpe gaw, Myen Hpyendap asuya hte "pyi-hkai-hpyu" pati ni, poi madu tai lit la woi awn galaw ai lam gaw, myit yu ra sai. Manau nau ai htunghking n lu ai amyu ni, Manau poi a poi madu tai woi awn galaw ai gaw mau hpa! Atsawm sung sung myit yu yang, dai zawn galaw ai lai the, dai hku galaw mayu ai masha ni a myit hpe gaw, tsang ai, matsat ai hte hkyet rung ai.

Anhte a Mungdaw masat Nhtoi poi hpe, anhte a htunghking Manau woi nau nna, shaning shagu galaw nga ga ai rai yang, Myen Hpyendap asuya hte shi a salung sala ni gaw, madu tai ai shara hpe hpa rai gashun gare la nna poi madu galaw mayu wa ma ta? Anhte madu tai woi awn galaw ai hpe yu n-gun n lu n krem ai majaw kun? Anhte woi galaw ai hpe yu manawn ai mahtang kun? Shing n rai anhte woi awn galaw ai poi hta shanhte sa shang lawm ai hpe, nyeng n nawn dum ai wa rai kun? Hpa majaw shanhte madu tai woi galaw mayu ai lam hpe mungchying masha yawng chye na hkra tara shang sang lang dan ai lam n nga ai majaw myit yu myit la na lam grai law wa sai. Dai ning sha madu galaw na ma ai kun? Galoi mung madu tai sana kun tsang hpa!

Hpa mi rai rai i, um nga bawngban jahkrup nna myit ngwi myit pyaw hte myit hkrum lam n la ai, ya na zawn gashun gare, gumshem ai lai gaw, anhte amyu ni a matu tsang ra ai, sadi maja ra ai lam rai sai.

Ngai shadu ai, Hpyendap asuya gaw, ngai nan woi awn galaw ai rai nga ai ngu nna myi man pa arawng la mayu ai re. Amyusha bawsang ni hte kanawn mazum ai lam hta galoi mung, 'Kahpu Ba' 'Sara Kaba' shara kaw nga mayu ai myit gaw shanhte a kraw kata hta arawng nga ai. Dai ning na Mungdaw Nhtoi masat poi gaw, Myen Hpyendap asuya a "Kahpu Ba' Sara Kaba' galaw mayu ai myit masa hpe mungchying shawa yawng, amyusha ni yawng, dan dan pra pra mu chye lu ai, sakse kumla rai sai.

Ngai bai myit sawn yu ai Hpyendap asuya gaw, mung masa lam hpe shi myit ra ai hku hkrang shapraw galaw sa wa ai hpe sha, myit n dik lu nga lu ai. Amyusha bawngsang ni a htunghking hpe du hkra shi myit ra ai hku, tinggyeng shanang galaw sa wa mayu ai re ngu: myit la lu nngai. Shanhte ra ai "Taiyin-ta tsi-lung nyi-nyut ye" mung, shanhte nan 'Kahpu Ba' Sara Kaba' tai ai hpe anhte kaga amyusha bawsang ni, mung shawa ni hkap la nna shanhte matsun ai shagu hpe, 'mai sa madu' ngu galoi mung hkap la, yin la, yau ya na hpe ra ai myit hkrum lam she rai nga ai gaw, dan dawng nga ai.

Myen Mungdan shanglawt lu ai hpang kawn, Ne Win 'ana' n zing shi ai shawng daw (1962) hpe democracy prat ngu nna, tsun masat nga ma ai raitim, anhte amyu ni a mung masa ningbaw ningla langai rai nga ai, Slg. San Hta Sin gaw, dinglik yu nna sakse madi madun ai the, 'democracy n htang' (democracy pyong-pan) ngu, tsun masat kau ya sai.

Yawng e democracy masa hte n htan shai ai ngu tsun kajai nga ai raitim, Hpyendap asuya gaw shi myit ra ai hku shagrin da lu sai, 2008 ning constitution kaw nna praw pru wa na uphkang lam hte asuya gaw, 'democracy n htang' prat na hta; grau sawng ai uphkang lam hte asuya rai wa na chyalu n rai nga a ni?

2011 ning kaw byin pru wa na asuya gaw, anhte amyusha ni a 'madu' shara hpe gashun la nna, madu tai uphkang reng sha na asuya rai wa na gaw, 2011 ning shaning nnan, January shata hta galaw ai Mungdaw masat Nhtoi poi a mabyin gaw, shawng sa lamik kumla re ngu sawn la ni ai.